Səudiyyə Ərəbistanı çempionatının 12-ci turunda ''Əl-Nəssr'' ''Əl-İttifaq''ın qonağı oldu.

"Football-plus.az" xəbər verir ki, ilk 10 turun hamısında qalib gəlməklə tarixinin ən uğurlu startını reallaşdıran Kriştiano Ronaldonun komandası mövsümdə ilk dəfə büdrəyib.

80-ci dəqiqəyə qədər hesabda öndə olan Ər-Riyad təmsilçisi yekunda 2:2-lik bərabərliklə barışmalı olub. Kriştiano bu qarşılaşmada qeyri-adi bir qol vurub. Joao Felişin zərbəsindən sonra top onun belinə dəyərək tora daxil olub. Qol portuqaliyalı superulduzun adına yazılıb.

Həm onun, həm də həmyerlisi Felişin aktivində çempionatda 13 qol var. Onlar bombardirlər yarışına başçılıq edirlər.

Qeyd edək ki, Ronaldo 2025-ci ili 41 qolla tamamladı. Ümumilikdə o, karyerasında 957-ci qolunu vurmaqla tarixi 1000 qol hədəfinə bir addım da yaxınlaşdı. Onun karyerasında 14-cü dəfə bir təqvim ilində 40 qol həddinə çatdığını da bildirək.

Amma maraqlıdı ki, 40 yaşlı futbolçu vurduğu 41 qola baxmayaraq bu il het-trik etmədi. O, sonuncu dəfə 2009-cu ili het-triksiz başa vurmuşdu.