2025-ci ilin yayında bir sıra önəmli ulduzlar Avropanı tərk edərək Səudiyyə Ərəbistanına yollandı.

"Football-plus.az" xəbər verir ki, onlardan biri Teo Ernandesdi.

28 yaşlı ispaniyalı sol cinah müdafiəçisi 6 illik “Milan” macərasına son qoyaraq 25 milyon avroya “Əl-Hilal”a yollandı. Teo Səudiyyə Ərəbistanında 3 ilə 60 milyon avro qazanacaq. İtaliya karyerasında A seriyasını və ölkə superkubokunu qazanan, eləcə də 4 dəfə ilin rəmiz yığmasına düşən Teonu “Milan” fanatları hələ uzun illər xatırlayacaq. Amma ötən mövsüm onun üçün uğursuz alındı. Xüsusilə ÇL-də “Feyenoord”la dueldəki fiasko zamanı yersiz qırmızı vərəqə almasını fanatlar ona bağışlamadı. “Milan”da ümumilikdə 262 rəsmi oyunda iştirak edərək hesabına 34 qol, 45 məhsuldar ötürmə yazan təcrübəli futbolçu bugünlərdə “Qazetta dello Sport”a müsahibə verib.

- Ər-Riyadda həyatın necə keçir?
- Əla. Mümkün olan ən yaxşı seçimi etmişəm. Yeganə mənfi cəhət yollardakı sıxlıqdı. Buranın tıxacı dəhşətdi.

- Simone İnzaqi səni Səudiyyə Ərəbistanına yollanmağa necə razı sala bildi?
- O, sadəcə, mənə “gəl, birlikdə qələbələr qazanaq” dedi. Bilirəm ki, “İnter”də onu “şeytan” adlandırırlar. Meydandakı İnzaqi ilə adi həyatdakı İnzaqi tam fərqli insanlardı. Meydandan kənarda o əsl centlmendi. Bəzər aramızda zarafatlar olur və mənə ötən mövsüm onu burda superkuboka həsrət qoymağımı xatırladır. Köməkçiləri ilə tez-tez Milan derbiləri və Dyumfrislə aramızdakı rəqabət haqda danışırıq.

- “Milan” superkubok matçı üçün Ər-Riyadda olarkən kiminləsə görüşə bildinmi?
- Bəli, “Napoli” ilə oyundan öncə bəziləri ilə görüşdüm. Ordan istədiyim şəkildə ayrıla bilməmişdim. Təəssüf ki, “Milan” uduzdu. Bartezaqi ilə bir qədər ayaqüstü söhbət etdim. Onu son oyunda iki qol vurması münasibətilə təbrik etdim, buna layiq olduğunu dedim. Bundan başqa, Modriçlə qucaqlaşdıq və səmimi söhbət etdik. Onunla “Real”da da bilrikdə oynamışam. Mükəmməl futbolçudu. Başqa səviyyədədi.

- Bəs rəhbərlikdən kiminləsə görüşdün?
- Bəli, Alleqri, Tare və İbrahimoviçlə. Furlani (baş direktor – red.) isə gəlmədi.

- Qərar vermək hüququn olsaydı, yenə də “Milan”dan ayrılardın?
- Qətiyyən. Əsas hədəfim klubda qalmaq idi.

- Ötən mövsümün qış transfer dönəmində “Komo”nun təklifini geri çevirməyin doğrudumu?
- Xeyr. Menecerim mənə bu barədə, ümumiyyətlə, hec bir məlumat verməmişdi. Sonradan mətbuatda oxudum ki, guya müqaviləni yeniləmək üçün astronomik məbləğ tələb etmişəm. Guya başqa kluba yollanmaq üçün dəridən-qabıqdan çıxırdım. Bunların hamısı yalandı.

- Sənin vida paylaşımın böyük əks-səda doğurdu. “Klubun seçdiyi yol vaxtilə məni bura gəlməyə vadar edən ambisiyalar və dəyərlərlə üst-üstə düşmür” ifadəsinə aydınlıq gətirə bilərsənmi?
- Nə yazmışamsa, həqiqətdi! Mən “Milan”a gələndə rəhbərlikdə Massara, Boban və mənim kumirim olan Maldini kimi isimlər var idi. İbrahimoviç, sözsüz ki, top futbolçu idi. Amma Maldini ayrılandan sonra “Milan”da hər şey pis tərəfə dəyişməyə başladı...

- Fanatların tənqidi səni üzdü?
- Bəli, çox üzdü. Düzdü, mənim də səhvlərim oldu. Məsələn, “Fiorentina” və “Feynoord”la oyunlarda aldığım qırmızı vərəqələr kimi. Amma biz də insanıq. Səhvlərimiz olur. Həmin matçlarda psixoloji cəhətdən yaxşı durumda deyildim. Fanatlar əsl Teonun “Milan”da necə oynadığını görüblər.

- Sənin bir qadına qarşı zorakılıq etdiyin də deyilirdi...
- Nəhayət, bu mövzuya aydınlıq gətirmək üçün əlimə fürsət düşüb. Bəzi insanlar, sadəcə, sənin həyatını və karyeranı məhv etməyə çalışır. Bu mövzu ortaya atılanda bəzi şərhləri üzülərək oxudum. Amma yaxınlarım və ailə üzvlərim gözəl bilir ki, bunların hamısı yalandı.

- Qayıdaq futbola. Ötən il “Latsio” ilə səfər oyununda su fasiləsi zamanı səninlə Leaonun Fonsekanın tapşırıqlarını dinləməkdən imtina etməyiniz səhv addım idi?
- Əslində bu məsələ süni şəkildə çox şişirdildi. Biz, sadəcə, Leao ilə meydana yenicə çıxdığımız üçün öz mövqelərimizdə qaldıq. Baş məşqçi ilə münasibətlərimizin qaydasında olmadığını deyirdilər. Amma bu, yalandı. Həm Fonseka, həm də Konseysao ilə münasibətlərim qaydasında idi. Düzdü, Konseysao avtoritar idi. Amma haqqımda deyilənlərin, yazılanların hamısı uydurmadı.

- Düşünürsən ki, “Milan” bu yay sənə qarşı haqsızlıq etdi?
- Bu yaşananları gözləmirdim. Daha yaxşı münasibətə layiq idim. Bəzi komanda yoldaşlarım məni qalmağım üçün dilə tutmağa çalışırdılar. Amma menecer zəng vurub sənə “burda qalsan, səni heyətdən kənarlaşdıracağıq” deyirsə, mən nə edə bilərəm? Yeni variant axtarmalı oldum.

- Maldininin ayrılması səni çox üzdü?
- Məni “Milan”a gətirən və bu səviyyəyə çatmağıma yardım edən məhz Maldini olmuşdu. İndiyə qədər də ünsiyyətimiz davam edir. Onun ayrılmasını qəbul edə bilmirdim. Ötən il bir dəfə Kalabriya ilə birlikdə bazaya Maldininin formasında gəldik. Bu hərəkətimiz bəzilərinin xoşuna gəlmədi. Etiraz edənlər hətta bayrağımızı da cırdılar. Həmin an başa düşdüm ki, “Milan” ruhu getdikcə zəifləyir. Bu ruh yalnız İbrahimoviçdə qalmışdı.

- O, komanda yoldaşı kimi necə biri idi?
- Məşqlərdə bizi az qala öldürürdü. Amma bunların hamısını bizim xeyrimiz üçün edirdi.

- Səncə, “Milan”da ən yaxşı qolun hansıdı?
- Çempion olduğumz il “Atalanta” ilə oyunda 90 metrlik fərdi keçiddən sonra vurduğum qol. Fanatlar indiyə qədər də o qolu xatırlayır. O an, sadəcə, instinktimə güvənərək hərəkət edirdim.

- Rafael Leao çempion mentallığına malikdi?
- Çox güclü futbolçudu. Sadəcə, bəzən fikri lazım olan yerdə olmur. Çempion olduğumuz mövsümdə biz onunla sol cinahda hər kəsi məhv edirdik. Fikrimcə, onun yeri məhz vingerdi. Mərkəz hücumçusu onluq deyil.

- Səncə, A seriyasının ən yaxşı sol müdafiəçisi idin?
- Bəli. Avropada ən çox Nunu Mendeşi bəyənirəm.

- Ötən mövsüm qardaşının şərəfini qoruduğu PSJ ÇL-in finalında “İnter”i darmadağın etdi...
- Bəli, ən azı onun qədər sevinirdim. İnzaqi tez-tez onu da mənə xatırladır. Amma mən nə edə bilərəm? Qəlbimin dərinliyində mən hələ də “Milan” azarkeşiyəm.

- Gələn il üçün hədəfin qardaşınla birlikdə DÇ-ni qazanmaqdı?
- Bəli. Bəzən gözümün önündə hələ də Kolo Muaninin DÇ-2022-nin finalında əldən verdiyi epizod canlanır. Ümid edirəm ki, İtaliya da DÇ-yə vəsiqə qazanacaq.

- Bəs “Milan” bu mövsüm skudettonu qazansa?
- Bunu fanatlarla birlikdə qeyd edəcəm.

- Bəs səni yenidən komandaya dəvət etsələr?
- İndi mən yalnız Səudiyyə Ərəbistanında qalib gəlmək barədə düşünürəm. Bəzi adamlar “Milan”da olduğu müddətdə ora qayıtmağım mümkün deyil.