İngiltərə çempionatının 16-cı turunda ''Liverpul'' ''Brayton''u qəbul etdi.

"Football-plus.az" xəbər verir ki, qalmaqallı açıqlamalarından sonra həftəiçi ÇL matçında iştirak ərizəsinə salınmayan Məhəmməd Salah bu dəfə oyundan öncə baş məşqçi Arne Slotla təkbətək söhbət edərək ''buzları əritdi''.

Salah oyuna ehtiyat oyunçular skamyada başlasa da, artıq 26-cı dəqiqədə zədə alan Co Qomesin əvəzinə meydana çıxdı. ''Liverpul''un 2:0 qalib gəldiyi görüşdə əsas qəhrəman dubl edən Uqo Ekitike oldu. Fransalı forvardın ikinci qolunda Salah hesabına məhsuldar ötürmə yazdı. Məhz bu ötürmə ona birdən-birə iki mühüm göstəriciyə nail olmağa imkan verdi.

Birincisi, misirli ulduz premyer-liqada ümumilikdə 280-ci qolun vurulmasında yaxından iştirak etdi (190 qol, 90 məhsuldar ötürmə)! Bununla da, o, premyer-liqada ən çox qolun vurulmasında yaxından iştirak edən futbolçuların siyahısında Frenk Lempardı (279, 177+102) geridə qoyaraq 3-cü pilləyə yüksəldi. İndi Salah bu göstəricidə yalnız Ueyn Runi (311, 208+103) ilə Alan Şirerdən (324, 260+64) geri qalır.

İkinci önəmli göstərici isə odu ki, Salah premyer-liqa tarixində bir klubun heyətində yaxından iştirak etdiyi qolların sayına görə liderliyə yüksəldi. 33 yaşlı vinger konkret ''Liverpul''da İngiltərə futbolunun elitasında 188 qol, 89 məhsuldar ötürməlik möhtəşəm performans ortaya qoyaraq 277 qolun vurulmasında yaxından iştirak edib. Bu göstəricidə isə Salah Runini geridə qoyaraq yeni rekordun sahibi oldu. Salahın mövsümün qalan hissəsində bu rekordu bir qədər də yaxşılaşdıracağı gözlənilir.

Runiyə gəlincə o, ''Mançester Yunayted''in heyətində premyer-liqada 183 qol, 93 məhsuldar ötürmə ilə 276 qolun vurulmasında yaxından iştirak edib. Onu da bildirək ki, Salah premyer-liqada ''Liverpul''dan başqa ''Çelsi''də də forma geyib. Amma o, 2014-ün yanvarında gəldiyi və 2015-in yanvarında tərk etdiyi londonluların heyətində yalnız 2 qol, 1 məhsuldar ötürmə ilə fərqlənə bilmişdi.