''Beşiktaş''ın mövsümün əvvəlində ''Atalanta''dan icarəyə götürdüyü Əl-Bilal Turenin müqaviləsində maraqlı bir maddənin olduğu üzə çıxıb.

"Football-plus.az" xəbər verir ki, son 4 turda 2 qol vuran malili forvard ümumilikdə bu mövsüm superliqada iştirak etdiyi 10 qarşılaşmada aktivinə 3 qol, 2 məhsuldar ötürmə yazıb.

Sən demə 24 yaşlı futbolçunun müqaviləsində şərtə bağlı olan məcburi transfer maddəsi var. Həmin şərt isə 15 qoldan ibarətdi. Yəni Ture rəsmi matçlarda ən azı 15 qol vuracağı təqdirdə ''Beşiktaş'' avtomatik olaraq ''Atalanta''ya 15 milyon avro ödəyərək onu daimi əsasda transfer etməli olacaq. Bu maddənin qüvvəyə minməsi üçün Ture mövsümün qalan hissəsində ən azı 12 qol da vurmalıdı.

İddialara görə İstanbulda xoşbəxt olan və məşqlərdə üzərində çox çalışan futbolçu 15 qol həddinə çatacağına inanır. Elə Sərgən Yalçın da həm hücumda, həm də vinger mövqeyində oynamağı bacaran bu futbolçunu çox bəyənir və ona tez-tez start heyətində yer verir.