Qış transfer dönəmini fəal keçirməyən və indiyə qədər yalnız 18 yaşlı ekvadorlu vinger Keni Arroyonun keçidi ilə kifayətlənən ''Beşiktaş''da futbolçulardan birinin müqaviləsi ilə bağlı maraqlı məqam ortaya çıxıb.

Artur Masuaku müqaviləsinin son mövsümündədi. Rəhbərlik təcrübəli müdafiəçiyə yeni müqavilə təklif etmək niyyətində deyil və onun mövsümün sonunda komandadan ayrılacağı gözlənilirdi. Amma sən demə 31 yaşlı futbolçunun müqaviləsində xüsusi maddə var imiş.

Belə ki, o, mövsüm ərzində ən azı 35 rəsmi oyuna çıxacağı təqdirdə müqaviləsi avtomatik olaraq birillik yenilənəcək! İndiyə qədər Konqo DR yığmasının üzvü cari ''futbol ili''ndə 30 rəsmi oyuna çıxıb. Yəni onun müqaviləsinin yenilənməsi üçün cəmi 5 oyuna çıxması yetərli olacaq. Amma məsələ burasındadı ki, nə rəhbərlik onun qalmasını istəyir, nə də futbolçu özü ''Beşiktaş''da qalmaq arzusundadı.

Bəzi matçlarda səhvlərə yol verdiyindən Masuakunun bu mövsüm fanatlarla münasibəti korlanıb və o, bir neçə dəfə ev oyunlarında fitə basılıb. Rəhbərlik təcili olaraq bu problemi yoluna qoymaq və onun müqaviləsindəki maddəni ləğv etmək istəyir. Bunun üçün artıq futbolçunun özü ilə danışıqlara başlanılıb.

Ötən mövsüm buna bənzər problem Rəşid Gezzalda da yaşanmışdı. Onun da müqaviləsində müəyyən sayda oyuna çıxacağı təqdirdə avtomatik olaraq daha bir il klubda qalacağı ilə bağlı maddə var idi. Amma tərəflər qarşılıqlı şəkildə bu maddəni ləğv etdilər və Gezzal 2024-ün yayında İstanbul nəhəngindən ayrıldı. Elə Masuakunun da bu məsələdə rəhbərliyə ciddi problem yaradacağı gözlənilmir. Çünki o özü də bu maddənin ləğv olunmasında maraqlıdı.

ƏLİ