"Qarabağ" Bizon ölkə kubokunun 1/8 final mərhələsində "Karvan-Yevlax"a qalib gəldi - 3:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Çox intizamlı oynadılar. Belə oyunlarda səbrli olmaq, oyun intizamını pozmamaq lazımdı. Bu rəqiblə 4 gün əvvəl oynamışdıq. Bizi çox yaxşı təhlil etmişdilər. 80-ci dəqiqəyə kimi qol vura bilmədik. İmkanlarımız var idi, dəqiqlik çatmadı. Belə oyunlar bəzən futbolçular üçün böyük fayda verir. Rəqib səni yaxşı tanıyır, sənə oynamaq imkanı vermir. Sən də axtarışda olursan ki, rəqibi səhvə məcbur edəsən. Buna nail olanda razı qalırsan. Maraqlı oyun oldu. Hər iki komanda intizamlı oynadı. Azarkeşlərimizə təşəkkür edirəm. "Karvan-Yevlax"a və Füzuli Məmmədova uğurlar arzulayıram.

- Ötən həftə "Qarabağ"da 800-cü oyuna çıxdız. Hansı hissləri keçirirsiz? 1000-ci matç sizin üçün prinsipialdı?
- Bu rəqəmləri hesablamıram. Sadəcə bəlkə daha da həvəsli oluram. Belə uğurlu statistika varsa, sevinməliyəm. Yəqin ki, hər futbolçunun arzuladığı rəqəm var. Məşqçilərin də arzuladığı karyera var. Uğurlu 200-300 oyun keçirəcəmsə, 1000-ə çatmaq istəyərəm. Uğursuz olsa, bəlkə maraqsız olar. Hər halda, üzərimizə düşən vəzifəni yerinə yetirməliyik. Qarşıdakı illərdə də çalışacağıq ki, daha intizamlı, məsuliyyətli olaq.

- Yankoviçə verilən sarı vərəqəyə görə etiraz etdiz...
- Bəli, həmin vərəqə verilməyə bilərdi. Bu cür hallar olur, əsəbləşirik, sonra sakitləşirik.

- Avrokubok matçlarına baxanda, görünür ki, “Qarabağ” 65-70-ci dəqiqələrdə daha çox qol buraxıb. Həmin vaxt təzyiq çox olur deyə, komanda qollar buraxır?
- Xüsusi səbəb yoxdu. Ola bilər ki, rəqib daha çox hücumda olur, bizi səhv etməyə məcbur edir. Həmişə bildirmişəm ki, 90 dəqiqə oyundan qopmamalıyıq.

- Ramin Musayev müsahibəsində bildirib ki, 2007-ci ildə “Neftçi”nin büdcəsi azaldığı üçün komandadan getmisiz, lakin Vlastimil Petrjala daha aşağı maaşa komandada qalıb. Doğru məlumatdı?
- Bəlkə də orda anlaşılmazlıq olub. Keçmişə qayıtmağa ehtiyac yoxdu.