Avropada çıxış edən bəzi türkiyəli futbolçular üçün həftəsonu uğurlu alındı. İngiltərədə iki türkiyəli isim qol sevinci yaşadı.

"Football-plus.az" xəbər verir ki, ilk növbədə Enes Ünalın ''Bornmut''u məğlubiyyətdən xilas etdiyini qeyd etməyə dəyər. Forvard 80-ci dəqiqədə meydana daxil olarkən onun komandası 1:2 geridə idi. Enes cəmi 1 dəqiqə sonra qol vuraraq hesabı 2:2 etdi. Özü də o, ağır zədədən döndükdən sonra ilk qolunu vurdu. Enes son qolunu 341 gün öncə vurmuşdu! Çempionşip təmsilçisi ''Hall Siti''nin şərəfini qoruyan Enis Destan isə bu klubda artıq ikinci qolunu vurdu.

Acun Ilıcalının komandası bu həftə KPR-in qonağı oldu. Yaxşı mövsüm keçirən ''Hall Siti'' bu matçda iki dəfə hesabda önə keçdi. Bu yay ''Trabzonspor''dan transfer edilən Destan komandasını 2:1 önə keçirən qolun müəllifi oldu. Amma bu qol yekunda ''pələnglər''ə heç 1 xal da qazandırmadı. Çünki komanda qalan müddətdə iki top buraxaraq 2:3 məğlub oldu. Dəniz Gül isə Türkiyə yığmasının ardından ''Portu''nun heyətində də növbəti qolunu vurdu. Ulduzu yeni parlamağa başlayan bu futbolçu Türkiyənin heyətində İspaniyaya qarşı çətin səfər oyununda fərqlənməyi bacarmışdı.

Dünən isə ''Portu'' ölkə kubokunun 1/16 finalında aşağı liqa təmsilçisi ''Sintrense'' ilə qarşılaşdı. ''Əjdahalar'' çətinlik çəkmədən 3:0-lıq qələbə qazandılar və ikinci qolu məhz Dəniz Gül vurdu. 21 yaşlı futbolçu bu mövsüm ''Portu''da 13-cü rəsmi oyunda artıq 3-cü qolunu vurdu.