Dünən La Liqanın 33-cü turunda elitada qalmaq uğrunda mübarizə aparan ''Xetafe'' ''Selta'' ilə ev oyununda çox mühüm qələbə qazandı (1:0).

"Football-plus.az" xəbər verir ki, Madrid təmsilçisinin yeganə qolunu 3-cü dəqiqədə penaltidən türkiyəli forvard Enes Ünal vurdu. Bu mövsüm La Liqada 14-cü dəfə fərqlənən 26 yaşlı futbolçu bombardirlər yarışında yalnız Levandovski (19) ilə Benzemadan (17) geri qalır. Enes üçün bu qarşılaşmanın başqa bir önəmi də var idi. Belə ki, o, La Liqada ümumilikdə 196-cı oyununu keçirərək turnirin tarixində ən çox oyuna çıxan türkiyəli futbolçuya çevrildi! Əvvəlki rekord 195 oyunla Nihat Kahveciyə məxsus idi. Bu siyahıda 3-cü pillədə 163 oyunla Arda Turan qərarlaşıb.

Müqayisə üçün bildirək ki, hazırda ''TRT Spor'' kanalında şərhçilik edən Nihat 58-i ''Real Sosyedad''ın, 18-i ''Vilyarreal''ın heyətində olmaqla La Liqada 195 oyuna 74 qol vurub. Enes isə 1-i ''Levante'', 5-i ''Vilyarreal'', 12-si ''Valyadolid'', 34-ü ''Xetafe''nin heyətində olmaqla bu turnirdə 196 oyuna 52 qol vurub. Yəni hazırda Enesi Nihatın rekordundan 22 qol ayırır.