PSJ-nin rəhbərliyi qapıçı Matvey Safonovu cəzalandırmamaq qərarına gəlib. Rusiyalı qapıçı bir həftə öncə verdiyi açıqlamada klubdakı durumundan narazılıq etmişdi.

Xatırladaq ki, bu yay Canluici Donnarumma komandanı tərk etsə də, onun əvəzinə Lüka Şevalye transfer edildi. Safonov isə ötən mövsüm olduğu kimi bu mövsüm də ikinci qapıçı statusundadı. 26 yaşlı əlcək sahibi bu mövsüm PSJ-nin heç bir rəsmi oyununda forma geyməyib. Safonov Rusiya mətbuatına verdiyi açıqlamada açıq şəkildə ona şans verilməməsindən gileylənmiş və məşqlərdə əlindən gələni etdiyini bildirmişdi.

Klubda onun sözlərindən narazı qalıblar. PSJ-də belə düşünürlər ki, qapıçının sözləri klubun nüfuzuna xələl gətirir. Ancaq Fransa mətbuatının yazdığına inansaq, rəhbərlik Safonovu cəzalandırmaq üçün yetərli əsas görməyib. Vəziyyətin dəyişəcəyi isə gözlənilmir.

Safonovun oyun praktikası qazanması üçün yeganə çıxış yolu klubunu dəyişməkdi. Qışda onun başqa kluba yollanacağı istisna edilmir. Elə PSJ rəhbərliyi də Şevalye ilə daha yüksək səviyyədə rəqabət apara biləcək bir qapıçı istədiyi üçün Safonovun ayrılmasının əleyhinə deyil.