“Sabah”ın Misli premyer-liqasının 7-ci turunda Şamaxıda “Karvan-Yevlax”a qarşı keçirdiyi oyunda zədələnən futbolçusu Coy-Lens Mikels fərdi məşqlərə başlayıb.

Bu barədə “Football-plus.az”a Masazır təmsilçisinin mətbuat xidmətinin rəhbəri Elnur Həmidov məlumat verib. Klub rəsmisi rəqib qapıçı Kamran İbrahimovla toqquşduqdan sonra xəstəxanaya aparılan, nəticədə qabırğa əzilməsi diaqnozu qoyulan hücumçunun komandayla birgə məşqlərə nə vaxt başlayacağının bəlli olmadığını bildirib.

Onun sözlərinə görə, hər şey bərpa prosesindən asılıdı. Mikelsin 8-ci turda evdə “Zirə”yə qarşı baş tutacaq görüşdə meydana çıxıb-çıxmayacağı da dəqiqləşməyib.

Xatırladaq ki, futbolçunun daxili orqanlarında hər hansı ciddi zədə və ya daxili qanaxma aşkarlanmayıb. Almaniyalı 4 qolla premyer-liqanın bombardiridi.

KƏNAN BAHADIR