İtaliya nəhəngi türkiyəli futbolçuya yeni müqavilə təklif etdi
Türkiyə yığmasının üzvü Zəki Çəlik ilə bağlı xəbər var.
Belə ki, ''Roma'' bu futbolçu ilə yeni müqavilə imzalamaq niyyətindədi. Artıq oyunçunun meneceri ilə danışıqlara start verilib. Bu xəbəri italiyalı insayder Nikola Skira paylaşıb.
28 yaşlı sağ cinah müdafiəçisinin müqavilə müddəti bu mövsümün sonunda başa çatır. ''Roma'' Zəkiyə ikiillik yeni müqavilə təklif edib.
Qeyd edək ki, ''Bursaspor''un yetirməsi olan və daha öncə ''Lill''də də çıxış edən Zəki 2022-ci ildən paytaxt təmsilçisinin şərəfini qoruyur. Bu mövsüm o, 7 rəsmi oyunda aktivinə 1 məhsuldar ötürmə yazıb. Bu mövsümdən etibarən ''Roma''nı çalışdıran Canpyero Qasperrini bu günlərdə Zəki haqda açıqlamalar vermişdi.
Təcrübəli məşqçi türkiyəlini tərifləyərək bunları demişdi:
''Zəkini ötən mövsümdən təqib edirəm. Çox bəyəndiyim oyunçulardandı. Etibarlı və çox yönlü futbolçudu. Cəlddi və üstəlik yaxşı texnikası var. Özü də bu, onun maksimum səviyyəsi deyil. Daha da inkişaf edə bilər. Hər mövqedə oynada biləcəyin etibarlı futbolçudu''.
