Azərbaycan Basketbol Federasiyasının (ABF) prezidenti, eyni zamanda da elm və təhsil naziri olan Emin Əmrullayev jurnalistlər qarşısında növbəti dəfə çıxış edib.

Onun təhsillə bağlı çıxışları, adətən, uzun müddət sosial şəbəkələrdə müzakirə olunur, bəzi kəlmələri lağlağı mövzusuna çevrilir. İllərini təhsilə vermiş müəllimlər, ekspertlər şikayətlənirlər ki, Əmrullayevin dedikləri reallıqla uzlaşmır. Bu dəfə Emin bəy mikrofonlar önünə nazir yox, federasiya prezidenti kimi çıxıb. Danışdıqları da problemlər içində çabalayan, ildən-ilə geri gedən təhsilimiz yox, basketbolumuz olub. Federasiya prezidenti çalışıb ki, Azərbaycan basketbolunun problemlərindən danışmasın, reallıqalardan deyil, utopik inkişaf xəyallarından danışsın.

Onun sözlərindən bir məqam daha çox diqqətimi çəkdi. Əmrullayev belə deyir:

Necə deyərlər, sitatın sonu... Emin bəyin məntiqi ilə yanaşsaq, idmana bağlı olan insanlar idmanı tənqid edə bilər. Mən də son 17 ildə idman jurnalistikasıyla fəal şəkildə məşğul olan, müntəzəm müəllif yazılarımda idmanımızın problemlərini qabardan biri kimi bu hüquqa sahibəm. Mən Basketbol Federasiyasının legionerlərə kütləvi şəkildə qucaq açmasının yanlış siyasət olduğunu deyirəm. Bunu da sübut etməyə hazıram. Heç uzağa getmək lazım deyil. Çox dəyərli Emin bəyin də Müşahidə Şurasının üzvü olduğu “Neftçi”yə baxın. Ölkənin ən qocaman klubunun uşaq akademiyalarının normal fəaliyyət göstərməməsinin səbəblərindən biri də ayrılan maliyyənin bir ucdan legionerlərə xərclənməsidi. Əcnəbilər gəlir-gedir, milyonlar xərclənir. Amma ortada nəticə yoxdu. “Neftçi” ölkə çempionatında uğurun da, avrokubokların da dadını unudub.

Cənab Əmrullayev elə AFFA-nın da fəaliyyətinə, acı təcrübəsinə nəzər sala bilər. İllər boyunca AFFA kütləvi “milliləşdirmə” ilə məşğul oldu. Millimizə soxuşdurulan əcnəbilərin coğrafiyası Braziliyadan, Argentinadan üzübəri Dağıstana, Ukraynaya, İrana qədər gəldi. Qazandığımız nə oldu? Hansı böyük turnirin final mərhələsinə vəsiqə qazandıq? Emin Əmrullayevin təbirincə desəm, Olimpiadada çıxış etmək bizə qismət olmadı. Nəinki böyük turnirlərdə oynamışıq, əksinə, tariximiz alçaldığı məğlubiyyətlərlə zəngindi. Avropada bizə qalib gəlməyən yığma qalmayıb, “cırtdanlar”ın arasında yer alırıq.

Çox təəssüf edirəm ki, Emin bəy özünü idmana bağlı adam sayır, amma yaxın keçmişdə yaşananlardan dərs çıxarmaq istəmir. Özü də təhsil işçisidi, təhsilimizin də başında dayanır. Əslində, dərs çıxarmağı özü daha yaxşı bacarmalıdı.

Futzal Federasiyasının prezidenti Zaur Axundov bir vaxtlar futzal yığmamıza da, “Araz Naxçıvan”ın futzal komandasına da braziliyalıları doldurmuşdu. Özü də fəxrlə deyirdi ki, lap Həbəşistandan da legioner gətirib, millidə oynatmağa razıdı, təki nəticə qazanılsın. Hanı o nəticələr? Zaur Axundovun gətirdiyi legionerlər gedən kimi Azərbaycan futzalı göydən yerə endi, qitənin ən zəiflərindən birinə çevrildik. Ara yerdə qiymətli zamanı və milyonları itirmişik. İndi basketbolumuzun da həmin yolu tutmasına təəssüflənirəm. Bu üsullu böyük uğurlar qazanmaq mümkün deyil, cənab Əmrullayev.

Aqillər deyir ki, ağıllı adam başqalarının səhvindən nəticə çıxarandı, öz səhvlərindən yox. Odu ki, futbolumuzun, futzalımızın başına gələnlərə baxıb, basketbolu bu bəladan qorumaq lazımdı. Uğur istəyiriksə, legionerlərin ətəyindən yapışmayaq, öz uşaqlarımızı yetişdirək. Həm də onları Azərbaycan cəmiyyətinə qazandıraq.

AMAL