Həftəsonu qərb derbisi keçiriləcək. “Kəpəz” “Azərsun Arena”da “Turan Tovuz”la qarşılaşacaq.

“Qəbələ” ilə oyunda mövsümdəki ardıcıl beşinci məğlubiyyətini alan Gəncə təmsilçisi Adil Şükürovla yolları ayırdı. Hazırda komandanın baş məşqçisi yoxdu. Bəs “Turan Tovuz”la səfər oyununa komandanı kim çıxaracaq? Bu və başqa məsələlərlə bağlı klubun mətbuat karibi Gəray Qarayevlə söhbət etdik.

- “Turan Tovuz”la oyuna komandanı kim çıxaracaq?
- İstənilən halda komandanı əvəzedicilərin baş məşqçisi Xaliq Mərdanov və klubun əlaqələndiricisi Vasif Vəliyev çıxaracaq.

- Yeni baş məşqçi təyin olunsa da?
- Bəli. Çünki baş məşqçi gələndən sonra komanda ilə tanış olmalıdı. Gələn kimi komandanı oyuna çıxarması real deyil.

- Bəs əvəzedicilərin məşqçisi Xaliq bəy əsas komandanı nə dərəcədə tanıyır? Geridə qalan beş tur ərzində əvəzdici komanda ilə əsas komanda birgə məşq edib ki?
- Xaliq müəllimlə Vasif müəllim illərdi bu klubdadı. Adil müəllim gedəndən sonra komandanı məşqlərə Xaliq müəllim çıxarıb. Bir həftədi komandanın içindədilər. Öz düşüncələrinə uyğun taktikalar qururlar. Gələn məşqçi kənardan gəlir. Komandanın içində olmur ki.

- Bəs əvəzediciləri oyuna kim çıxaracaq?
- Onu da elə Xaliq müəllim. Oyunlar fərqli günlərdədi.

- Bəs yeni baş məşqçi nə vaxt bəlli olacaq?
- Həftəsonu, ən geci gələn həftənin əvvəlində.

Xatırladaq ki, “Kəpəz”in əvəzediciləri də turnir cədvəlinin sonuncu pilləsində qərarlaşıb. Xaliq Mərdanovun komandası 5 oyuna bir xal toplayıb.

MÜZƏFFƏR QULUZADƏ