“Əlimizdən gələni edəcəyik ki, maksimum nəticə qazanaq. Ümid edirəm ki, qələb qazanıb, azarkeşləri sevindirərik. Sabah qələbə üçün meydana çıxacağıq”.

“Football-plus.az” xəbər verir ki, bu sözləri Azərbaycan milli komandasının müdafiəçisi Elvin Cəfərquliyev deyib.

O, jurnalistlərin suallarını da cavablayıb.

- Müdafiə xəttində vəziyyət necədi?
- Özümü komanda yoldaşlarımdan fərqləndirmək istəmirəm. Öz işimi görürəm. Keçən oyundan sonra müsahibəmdə də qeyd etdim ki, fərdi baxımdan səhvlərimiz oldu. Bu gün Estoniya ilə oyuna baxmışıq. Bəzi səhvlərimiz var idi. Xüsusilə də müdafiədə. Sabah daha yaxşı çıxış etməyə çalışacağıq.

- Keçən il Estoniyanı udmuşduq, bu dəfə uduzduq. Bir ildə nə dəyişdi?
- Dəyişikliklər barədə nəsə deyə bilmərəm. Ötən oyunda qələbə qazana bilərdik və qazanmalıydıq da. Bu dəfə də qalib gəlmək mümkün idi. İlk hissədə epizodlardan düzgün istifadə edə bilmədik. Bir xeyli qol imkanımız oldu. Qaçırdınsa, rəqib səni cəzalandıracaq.

- Millinin heyətində üzdə olan futbolçular oynayır. Fərd olaraq ən yaxşılardı. Niyə meydanda komanda şəklində alındıra bilmirsiz?
- Çox yaxşı oyunçularımız var. Səbəbini sizə deyə bilmərəm, açıqlama verə bilməyəcəm. Ümid edirəm ki, komanda şəklində daha yaxşı çıxış edəcəyik.

- Karyeranın ən yaxşı dövrünü yaşayırsan. Fiziki və psixoloji cəhətdən özünü necə hiss edirsən?
- Təkcə bu il deyil ki, üçgündənbir oynayıram. Çoxdan bu sistemdə çıxış edirəm. Üçgündənbir oyundan özümün də xoşum gəlir. Tempi saxlayırsan, düşmürsən.

ƏSƏD SEYİDOV