Ötən mövsümü 5-ci yerdə bitirən “Zaqatala” bu mövsüm 1-ci liqada daha yaxşı nəticə əldə etmək fikrindədi. Ancaq “Music Gallery”nin kluba sponsorluqdan imtina etdiyi də məlumdu. Ondan sonra hansısa sponsor barədə məlumat olmadı.

Komandanın baş məşqçisi Rüstəm Məmmədovla söhbətdə bəzi suallara cavab tapmağa çalışdıq.

- Sponsor tapıldı, yoxsa AFFA-nın ayırdığı büdcə ilə kifayətlənəcəksiz?
- Bu suala cavab verə bilməyəcəm. Çünki bu mənə yox, klub rəhbərliyinə aid məsələdi.

- Məşqlərə başlamısızmı?
- Başlamışıq. Avqustun 4-də məşqlərə start vermişik. Əsasən seleksiya xarakterli məşqlərdi. Bəzi müqaviləsi olan futbolçular komandada qaldı. Baxışa dəvət etdiyimiz, çağırdığımız bir neçə oyunçu var. Amma hələ ki müqavilə imzalanmayıb.

- Nəyə görə müqavilə bağlanmayıb?
- Sponsor məsələsi ilə bağlıdı. Bu məsələyə aydınlıq gəlmədiyi üçün biz də dəqiq qərar verə bilməmişik. Çox güman, bugünlərdə həll olar. Sponsorluq digər klublarda olduğu kimi bizdə də problemə çevrilib. Yəqin ki, AFFA-nın ayırdığı 300 minə əsasən işimizi davam etdirəcəyik.

- İlkin Qırtımovla anlaşdığınız deyilir. Doğrudumu?
- İlkinlə ancaq danışığımız olub. Hələ ki razılaşma əldə olunmayıb. Futbolçunun istədiyi məbləğ var. Biz onu verə bilməsək, razılıq olmayacaq. Danışıqlar gedir.

MÜZƏFFƏR QULUZADƏ