Xəbər verdiyimiz kimi, Vinisius Juniorun “Real”la müqaviləsinin müddəti 2027-ci ili qədərdi. Ancaq Madrid klubu müddəti 2030-cu ilə qədər uzatmağa çalışır.

Hədəf braziliyalı ulduzla Kilian Mbappe ətrafında uzunmüddətli layihə qurmaqdı. Ancaq bir neçə aydı davam edən danışıqların artıq dalana dirəndiyini demək olar. Əsas səbəb braziliyalının maliyyə ambisiyalarında gizlənir.

İspaniya mediasına inansaq, Vini hər il üçün 25 milyon avro sabit maaş tələb edir. Mbappe də Madrid klubunda məhz bu qədər qazanır. Buna qədər isə braziliyalı ulduzla bonuslar qarışıq 20 milyon avro maaş variantı müzakirə olunurdu.

Vəziyyətin dalana dirəndiyini görən klub prezidenti Florentino Peres artıq məsələni öz nəzarəti altına almağa qərar verib. Onun əsas niyyəti Vinisiusun agentini danışıqlardan kənarda qoymaq, futbolçu ilə birbaşa ünsiyyət sayəsində vəziyyəti aydınlaşdırmaq və vasitəçilərin müdaxiləsi olmadan kompromiss yolunu tapmaqdı.

Danışıqlar ətrafında ümumilikdə gərgin ab-havanın hökm sürməsinə baxmayaraq, “Real” sakitliyi qoruyur. Vini özü də dəfələrlə “adını klub tarixinə yazmaq” istəyini gizlətməyib. Ancaq onun ötən mövsümün sonundakı qeyri-sabit oyunu, idman forması fonunda tələbləri klub rəhbərliyinə bir qədər yersiz görünür.