PSJ-nin hücumçusu Kilian Mbappe Fransa yığmasının oyunçuları üçün məcburi olan, sponsorların da qatıldığı tədbirdə iştirakdan da boyun qaçırıb.

Bu isə futbolçunun ailəsi, vəkilləri və Fransa Futbol Federasiyası arasında bir neçə aydı davam edən uğursuz danışıqların nəticəsidi. Mbappe yığma üzvlərinin imic hüquqlarından yararlanmaqla bağlı qaydaya dəyişiklik edilməsini istəyir. Məsələn, şəxsi müqaviləsinin olmadığı sponsorların reklanı zamanı adından istifadənin əleyhinədi. Və ya yığmanın əməkdaşlıq etdiyi bəzi sponsorları bəyənmir. “Coca Cola” yığmanın sponsorları sırasına daxildi, Kilian isə sağlam həyat tərzindən uzaq olan brendin reklamında çəkilmək istəmir.

Mbappenin və yerli futbol qurumunun təmsilçiləri sonuncu dəfə bir ay əvvəl görüşüb. Danışıqların dalana dirəndiyini nəzərə alan futbolçu bugünlərdə keçirilən son tədbirə qatılmayıb. Tərəflər arasında təmaslar yaxın günlərdə davam edəcək. Sponsorlar da indiki durumdan qəti şəkildə narazıdı.
Mbappenin PSJ ilə müqaviləsinin müddəti isə cari mövsümün sonunda bitəcək. Tərəflər hələ də müddəti uzatmaqla bağlı razılığa gəlməyib. Kilianın artıq “Real”la ilkin müqaviləyə imza atmasına dair çoxlu xəbər yayılıb.