''Fənərbaxça''dan mühüm istefa xəbərləri gəlməkdə davam edir.

"Football-plus.az" xəbər verir ki, ötən ay vitse-prezidenti Acun Ilıcalı sürpriz şəkildə istefa vermişdisə, iyulun 6-da futbol koordinatoru Okan Özkan öz istəyi ilə istefa məktubunu rəhbərliyə təqdim etmişdi. Halbuki o, bu vəzifəyə yalnız iyunda gətirilmişdi. İndi də başqan vəkili Erol Biləcik yazılı bir açıqlama ilə istefa verdiyini açıqlayıb.

Əslində Acun Ilıcalı və Okan Özkandan fərqli olaraq bu dəfəki istefanı sürpriz adlandırmaq çətindi. 63 yaşlı Biləcik Əli Koçun prezidentlik dönəminin ilk günündən, yəni 2018-ci ildən ''Fənər''in idarə heyətinin üzvü idi. Ötən ay onunla bağlı çox mühüm bir qalmaqal yaşanmışdı. Biləcik şəxsən Əli Koç üçün yazdığı və ona göndərmək istədiyi bir elektron məktubu səhvən (və ya bilərəkdən) idarə heyetinin digər üzvlərinə göndərmişdi. Onun yazdığı məktubda sabiq başqan Əziz Yıldırımla bağlı ağır ifadələrin olması diqqət çəkmişdi. Biləcik məktubda Yıldırımı ''səriştəsiz adam'' adlandırmış və onunla bağlı ''seçkilərdə onu sandıqda basdırarıq'' cümləsini yazmışdı.

Təbii ki, bu olay mətbuata sızan kimi camiədə qalmaqal qopdu. Əziz Yıldırım da sərt üzünü göstərdi. O, Erol Biləcikin klubdan və idarə heyətindən uzaqlaşdırılması üçün klubun İntizam Komitəsinə rəsmi şəkildə müraciət etdi. Çox ciddi tənqidlərə məruz qalan Biləcik istefa verməsə də, qarşıdakı seçkilərdə artıq Əli Koçun siyahısında olmayacağını açıqlamışdı.

Seçkilər isə sentyabrda baş tutacaq. Yəni o, faktiki olaraq sentyabra qədər işlədikdən sonra klubda ayrılacağını bildirmişdi. Ancaq bəzi fanatları və Əziz Yıldırımın tərəfdarlarını hadisələrin bu cür axarı qane etmədi. Onlar Erol Bileciki və onun ailə üzvlərini narahat etməkdə davam etdilər. 7 ildi klubda olan, iş adamı isə sonda ''ağ bayraq'' qaldıraraq bu gün istefa verdiyini açıqladı.