Girassi “Monterrey”in yolunu kəsdi - İCMAL
1/8 finalın son oyunu Avropa komandası üçün heç də asan keçmədi. Hərçənd oyunun əvvəlində “Borussiya”nın işləri yağ kimi getdi.
Artıq 14-cü dəqiqədə dortmundluları irəli çıxaran Girassi 10 dəqiqə sonra fərqi artırdı. Almanlar topa, əraziyə daha yaxşı nəzarət edir, imkanlardan effektli şəkildə yararlanırdı, “Monterrey” isə hücumda çəkingən görünürdü. Meksikalıların da şansları var idi, sadəcə, o qədər inamlı deyildi. Bəlkə də əsəbilik onlara mane olurdu. Əslində “Borussiya” da əlahiddə kreativ oyun göstərmirdi. Sadəcə, debütdə vurulan iki qol “Monterrey”ə hissənin sonuna qədər özünə gəlməyə imkan vermədi.
İkinci hissədə bir qədər fərqli oyun izlədik. Artıq meksikalılar daha toparlanmış və inadkar oyun göstərməyə başladı. 48-ci dəqiqədə fərqli azaldan Berterame “Borussiya” düşərgəsini həyəcanlandırdı.
Almanların oyunun axarını sakitləşdirməklə bağlı cəhdləri heç bir nəticə vermirdi. Sona qədər fəal təsir bağışlayan, təzyiq göstərən meksikalılar rəqibin müdafiəsini daim gərginlikdə saxladı. Ancaq bəzən bəxt “Monterrey”in oyunçularından üz döndərdi, bəzi məqamlarda da ustalıq və soyuqqanlı davranış çatışmadı. Nəticədə minimal üstünlüyü qoruyan “Borussiya” 1/4 finalda “Real”a rəqib oldu.
1/8 final
Borussiya D – Monterrey 2:1 (2:0)
Borussiya (Dortmund, Almaniya): Kobel, Bensebayni, Anton, Zyule, Svensson, Qros, Nmeça (Koutu, 70), Ryuyerson, Adeyemi (Brandt, 70), Girassi, Cob Bellingem (Zabitser, 55).
Monterrey (Meksika): Andrada, Ramos, Rodriges, Medina, Arteaqa, Kanales (Alvarado, 90), Deossa, Torres (Ambris, 83), Agirre, Korona (De la Rosa, 83), Berterame (Okampos, 83).
Qollar: Girassi, 14 (1:0). Girassi, 24 (2:0). Berterame, 48 (2:1).
Vərəqələr: Cob Bellingem, 28. Girassi, 90+3 – sarı.
Hakim: Fakundo Telyo (Argentina).
2 iyul. Atlanta. 31442 tamaşaçı.
Oyundan sonra
Niko Kovaç, “Borussiya”nın baş məşqçisi:
“Gözlədiyimiz kimi oldu, oyun çətin keçdi. İlk yarıda yaxşı oynadıq, daha bir-iki qol vurmalıydıq. İkinci hissədə isə yaxşı müdafiə olunduq, bu da vacib idi. Rəqib bizə böyük təzyiq göstərdi, ancaq düşünmürəm ki, “Monterrey”ə hədsiz çox qol vəziyyəti yaratmağa imkan verdik. Fasilədən sonra yetərincə aqressiv deyildik, yüksək oyun səviyyəsini qoruya bilmədik. Əsas odu ki, hədəfə çatdıq. “Real”la oyun bizim üçün bonus və böyük sınaq olacaq”.
Serxio Ramos, “Monterrey”in müdafiəçisi: “Bu gün tamaşaçılar, bütün azarkeşlərimiz, futbolu anlayan adamlar gördülər ki, komanda qalib gəlmək üçün tələb olunan hər şeyi verdi. Bəzən futbolda hər şey alınır. Bəzi hallarda isə məğlubiyyəti qürurla və başıuca qəbul etmək lazımdı. Birinci dəqiqədən sonuncuya qədər fantastik oyun keçirdik. “Borussiya”nın sürətli və nəhəng futbolçular ilə irəlidə effektli olacağını bilirdik. Rəqib ilk yarıda çox effektli oynadı. Vicdanımız təmizdi. Sadəcə, bəzən hər şey istədiyin kimi alınmır”.
Digər xəbərlər
