Yeni mövsümə güclü heyətlə başlamaq istəyən ''Qalatasaray''la bağlı xəbərlər var.

Türkiyə mətbuatının yazdığına inansaq, 3 futbolçu - Karlos Kuesta, Pşemislav Frankovski və Eliart Yelert Okan Burukun planlarına daxil deyil.

Maraqlıdı ki, hər 3 futbolçu kluba ötən mövsüm gəlib və onlar üçün ümumilikdə 26 milyon avro ödənilib. Rəhbərlik hazırda bu oyunçulardan qurtulmağın yollarını axtarır.

Bu arada Türkiyə çempionunun hələ də Yunus Akgün problemini yoluna qoya bilmədiyi məlum olub. Bu futbolçu artıq faktiki olaraq müqaviləsinin son ilinə qədəm qoyub. Çünki onun müqavilə müddəti gələn ilin iyunun 30-da başa çatır.

Yanvardan bu yana, yəni 7 aydı davam edən danışıqlar hələ də bəhrəsini verməyib. Türkiyə mətbuatının yazdığına inansaq, indi də anlaşmaya Yunusun menecerləri mane olur.

Əslində klubun öz yetirməsi olan bu istedadlı futbolçu anlaşma çoxdan əldə olunub. Kərəm Aktürkoğlunun ayrılmasından sonra ''Cim-Bom''un əsas oyunçularından birinə çevrilən və son çempionluqda heç də az rol oynamayan Yunusa illik 130 milyon avroluq (təxminən 2,7 milyon avro) maaş təklif olunub. Yəni onun əvvəlki maaşı təxminən 5%6 dəfə artırılıb! Amma 24 yaşlı vinger təklifə müsbət cavab verməsinə rəğmən hələ də imzalar atılmayıb.

Məsələ burasındadı ki, onun iki meneceri var. Hər iki meneceri - Villyam Davilla və Cenk Melih Yazıcı rəhbərlikdən lirə ilə yox, avro ilə olan müqavilə tələb edib. Ancaq Türkiyədə bir neçə il öncə yaşanan inflyasiyadan sonra ''Qalatasaray''da bütün yerli isimlərlə müqavilə lirə ilə imzalanır.

Elə baş məşqçi Okan Burukla da bu şərtlərdə müqavilə imzalanıb. Hətta vaxtilə Fatih Terimə də yerli valyuta ilə ödəniş edilirdi. Ona görə də rəhbərlik bütün bunları menecerlərə xatırladaraq onların istəyini geri çevirib. Bu məsələdə kimin geri addım atacağını zaman göstərəcək.

''Sarı-qırmızılar'' üçün daha bir problem yaradan məqam müqavilədəki sərbəst qalma maddəsidi. Belə ki, 11 milyon avro ödəyən klub Yunusu heyətinə qata bilər. Ona görə də anlaşma nə qədər tez əldə olunsa, ''Qalatasaray'' üçün bir qədər faydalı olacaq.

Qeyd edək ki, Türkiyə yığmasının də önəmli oyunçularından olan Yunus geridə qoyduğumuz mövsümdə 44 rəsmi oyunda aktivinə 12 qol, 14 məhsuldar ötürmə yazıb.