Ötən mövsümü 4-cü yerdə başa vuraraq avrokuboklardan kənarda qalan “Turan Tovuz” yeni mövsümə hazırlaşır. Bu haqda klubun mətbuat xidməti şəkillər paylaşaraq məlumat yayıb.

“Football-plus.az” şəkildə olanlara əsasən məşqlərdə kimlərin iştirak edib-etmədiyini araşdırıb.

Komandanın kapitanı Şəhriyar Əliyev və Denis Marandiçi uzunmüddətli zədədən sonra komanda ilə məşqlərə başlayıb. Tural Bayramlı, Rəhim Sadıxov, Emmanuel Hakman, Roderik Miller, Xəyal Nəcəfov, Aleks Souza, David Tavareş, Hayderson Urtado, Faiq Hacıyev, Ayxan Hüseynov, Orxan Əliyev və əvəzedici heyətdən bir neçə futbolçunun komanda ilə məşq etdiyi görüntülənib.

Tovuz təmsilçisi iyulun 1-dən Kürdəxanıda açılmış yeni bazada – “Hünər”də çalışmalara start verib.

Kurban Berdıyevin komandası iyulun 6-19-u aralığında Ankarada olacaq. Toplanışın ikinci mərhələsi isə iyulun 24-də Boluda başlayacaq. Bolu toplanışı da 13 gün, avqustun 6-na qədər davam edəcək. Rəqiblərin kimliyi və oyunların tarixi hələ ki bəlli deyil.

MÜZƏFFƏR QULUZADƏ