"Bu komandalarla mübarizə apara bilərik" - Rimas Kurtinaytis
Çempionlar Liqasında zəif rəqib yoxdu.
"Football-plus.az" xəbər verir ki, bu sözləri "Sabah" basketbol komandasının baş məşqçisi Rimas Kurtinaytis klubun mətbuat xidmətinə açıqlamasında deyib.
O, turnirin müntəzəm mövsümündə B qrupunda yer alan rəqiblərlə bağlı fikirlərini bölüşüb:
“Püşkatma ilə bağlı hər hansı illüziyalar qurmurduq, rəqibləri güclü və zəiflərə bölmürdük. B qrupunda yer alan rəqiblərimizə gəlincə, “Alba” 24 illik fasilədən sonra yenidən FIBA bayrağı altında çıxış edəcək. Bu komanda uzun illər Avroliqanın daimi sakini olub. Səviyyəsi bəllidi. Məncə, turniri qazanmağa favorit komandalardan biridi".
Litvalı mütəxəssis Çexiya təmsilçisi “Nimburk” haqqında da danışıb:"Bu komanda daha öncə FIBA Avropa Kubokunda “Sabah”ın rəqibi olub. İntizamlı, heyəti keyfiyyətli basketbolçulardan ibarət kollektivdi. Ötən mövsüm Çempionlar Liqasında 1/4 finala kimi irəliləyiblər. Təsnifat mərhələsində yer alan potensial rəqiblərimiz arasında da yaxşı komandalar var. Mən Fransa təmsilçisi “Şole”də oyunçu kimi çıxış etmişəm. Bir sözlə, Çempionlar Liqasında zəif rəqib yoxdu. Bizim rəqabətədavamlı heyətimiz formalaşır. Bu komandalarla mübarizə apara bilərik”.
Xatırladaq ki, püşkatmanın nəticələrinə əsasən, Bakı klubu B qrupunda "Nimburk" (Çexiya), "Alba" (Almaniya) və təsnifat mərhələsindən gələcək komanda ilə qarşılaşacaq. Çempionlar Liqasının müntəzəm mövsümünə oktyabrın 7-də start veriləcək.
Digər xəbərlər
