İkiqat MBA çempionu, yüngül forvard mövqeyində çıxış edən amerikalı Kevin Dürant “Finiks”dən “Hyuston”a transfer olunub.

"Football-plus.az" xəbər verir ki, “Finiks” öz növbəsində Dillion Bruks, Ceylen Qrin, eləcə də 2025-ci il MBA draftının ilk raundunda 10-cu seçim hüququnu və ikinci raundun beş seçim hüququnu əldə edib.

36 yaşlı Dürant dördqat olimpiya çempionu (2012, 2016, 2020, 2024), həmçinin 2010-cu ildə Türkiyədə keçirilmiş dünya çempionatının qalibidi. O, MBA-da 2007-ci ildə debüt edib, bu müddətdə “Oklahoma-Siti”, “Qolden Steyt” və “Bruklin” klublarında çıxış edib. 2023-cü ildən “Finiks”də oynayırdı.

Bu arada Dürantın PSJ-nin səhmlərində minoritar paya yiyələndiyi məlum olub. Bu haqda məlumatı paytaxt klubu yayıb. Parislilər onun səhmlərin konkret neçə faizinə yiyələndiyini açıqlamayıb.

Dürant səhmləri özünün media şirkəti və “Boardroom” investisiya şirkəti vasitəsi ilə alıb.