Çiro İmmobilenin ''Beşiktaş'' karyerası başa çatmaq üzrədi.

"Football-plus.az" xəbər verir ki, tanınmış italiyalı forvard vətəninə qayıda bilər.

''Corriere dello Sport''un məlumatına görə ''Bolonya'' bu futbolçunu heyətinə qatmaq istəyir. Amma İmmobilenin İstanbul nəhəngi ilə hələ birillik müqaviləsi var. Məsələni qəlizləşdirən məqam onun 6 milyon avroya bərabər olan illik maaşıdı. Əslində ''ağ-qaralar'' ondan qurtulmağa və müqaviləni qarşılıqlı şəkildə ləğv etməyə çoxdan hazırdı. Amma İmmobile müəyyən təzminat tələb edir.

Futbolçunun meneceri Alessandro Mocci ''qartal''dan müəyyən məbləğ ''qoparmağa'' çalışır. Çünki ''Bolonya'' 35 yaşlı futbolçuya illik maksimum 2 milyon avro təklif edir. ''Beşiktaş'' isə heç bir məbləğ ödəmək istəmir. Danışıqlar davam edir. İmmobile üçün zaman daralır.

Bu məsələ iyulun 1-nə qədər həllini tapmalıdı. İtaliyalı futbolçu həmin tarixə qədər müqaviləni poza bilməsə, ''Beşiktaş''ın hazırlıq dönəmində iştirak etməli olacaq. Komanda yeni mövsümün hazırlıqlarına məhz iyulun 1-dən etibarən İstanbulda start verəcək.

İmmobilenin indiyə qədər ''Beşiktaş''da 41 rəsmi oyunda aktivinə 19 qol, 4 məhsuldar ötürmə yazdığını bildirək.