Lionel Messi “Barselona”nın keçmiş oyunçusu Ronaldinyonu arxada qoyub.

"Football-plus.az" xəbər verir ki, “İnter Mayami”nin hücumçusu MLS-in “Filadelfiya” ilə səfər matçında (3:3) bir dəfə qapıya yol tapıb. Messi karyerasında cərimə zərbəsi ilə 67-ci qolunu vurmaqla Ronaldinyonun göstəricisini (66) arxada qoyub.

Yenə sol ayaqla
“İnter Mayami” mayın 25-də Çesterdə keçirilən matçın 85-ci dəqiqəsinə qədər iki top fərqi ilə geridə idi. Amma təslim olmayan mayamililər rəqib qapısını böyük qüvvə ilə təzyiq altında qoymaqla məğlubiyyətdən qaça bildilər. Əvvəlcə Xordi Albanın Luis Suaresə ötürməsi bir nəticə vermədi. Qonaq komandanın oyunçuları bu halda daha sadə varianta üstünlük verməyi lazım bildilər: topu Messiyə verməklə onun təkbaşına nəsə edə biləcəyinə ümid bəslədilər. Bu variant baş tutdu. Lionel topu qəbl edəndən sonra üç rəqibi arxada qoydu və qapıya 20 metr məsafədə kobudluğa məruz qaldı.

Bundan sonra dünya çempionunun ifasında sehirli məqam baş verdi. Bəli, azarkeşlər belə hala dəfələrlə şahidlik ediblər. Argentinalı hücumçu qapının sol küncünə baxaraq topu o istiqamətdə qapıya yönəltdi. Fərqin minimuma enməsi mayamililəri ruhlandırdı. Və 90+5-ci dəqiqədə Telasko Seqoviya hesabı 3:3-ə çatdırdı.

Messi rekorda can atır
Qeyd edək ki, Messi indi dünya futbolunda cərimə zərbəsi ilə vurulan qolların sayına görə yalnız iki braziliyalıdan - Juninyo Pernambukano (77) ilə əfsanəvi Peledən (70) geri qalır. Onun hesabında 67 belə qol var. “İnter Mayami”nin hücumçusu daha bir braziliyalı Ronaldinyonu arxada qoyaraq 3-cü yerin tək sahibinə çevrilib. Aydın məsələdi ki, Lionelin yaxın gələcəkdə cərimə zərbəsi ilə vurduğu qollarının sayını artırmaq şansı var. Onun rekorda doğru irəlilədiyini də xüsusi vurğulayaq.

Maraqlıdı ki, bu planda Messidən sonrakı yeri Kriştiano Ronaldo tutur. Portuqaliyalı hücumçu cərimə zərbəsi ilə 64 qolun müəllifi olub. Karyerasını başa vurmağı ağlından belə keçirməyən “Əl-Nəssr”in 40 yaşlı hücumçusu da rekordu azı təkrarlamaq şansına malikdi.

Modriç Messiyə dəstək verə bilər
“İnter Mayami” bu mövsüm MLS-də heç də əla çıxış etmir. Xavyer Masçeranonun komandası ABŞ çempionatının yüksək liqasında keçirdiyi 15 oyuna 26 xal qazanıb. Mayamililər Şərq konfransında 15 iştirakçı arasında 6-cı yeri tuturlar. Onların KONKAKAF-ın Çempionlar Kubokunda yarımfinala qədər irəlilədiklərini və bu mərhələdə iki oyunun ümumi nəticəsinə əsasən “Vankuver”ə 1:5 hesabıyla uduzduqlarını da xatırladaq.

Masçeranonun komandası vəziyyəti başqa bir ulduz futbolçunun sayəsində yaxşılaşdıra bilər. Belə ki, son günlər “Real”ı yayda tərk edəcək Luka Modriçin hansı kluba keçə biləcəyi haqda xəbərlər yayılıb. O, Ronaldo və ya Messinin komanda yoldaşı ola bilər. 39 yaşlı futbolçu bu il Klublararası Dünya Çempionatından sonra “Real”dan azad agent kimi ayrılacaq. “Footmercato”nun məlumatına görə, Modriçə “Əl-Nəssr” (Səudiyyə Ərəbistanı) və “İnter Mayami”dən təkliflər gəlib. Yarımmüdafiəçi ilə Səudiyyə Ərəbistanının “Əl-İttifaq” klubu və bir neçə Braziliya təmsilçisi də maraqlanır.

Deyilənə görə, Modriç uzun müddətdi Ronaldo ilə eyni komandada oynamaq üçün “Əl-Nəssr”ə keçmək imkanını müzakirə edir. Lakin onun ailəsi ABŞ-yə köçməyi daha əlverişli variant sayır. İspaniyada çıxan “Mundo Deportivo” qəzeti Lukanın mayamililərlə 2,5 milyon dollar maaşı nəzərdə tutan birillik müqavilə təklifi aldığını xəbər verib.

Yeri gəlmişkən, İspaniya mənbələri Messinin 2024-cü ildə Modriçi “İnter Mayami”də görmək istədiyini iddia etmişdi. Ancaq xorvatiyalı futbolçu “Real”da daha bir mövsüm top qovmağa üstünlük vermişdi.