AFFA İntizam Komitəsi "Qarabağ"ı və "Sabah"ı cərimələyib.

"Football-plus.az" xəbər verir ki, İntizam Komitəsinin bugünkü iclasında tərəflər arasında keçirilmiş ölkə kubokunun final oyununda yaşananlara hüquqi qiymət verilib.

"Qarabağ"a dörd nəfər sarı vərəqə aldığı üçün 700 manat cərimə kəsilib. Ağdam təmsilçisinin məşqçisi Müşfiq Hüseynov 120-ci dəqiqədə meydana daxil olaraq hakimin qərarına etiraz edib. Birbaşa qırmızı vərəqə alan mütəxəssis iki oyunluq cəza alıb. Kluba 1500 manat cərimə tətbiq olunub.

Komandanın futbolçusu Yassin Benzya referini təhqir etdiyinə görə birbaşa qırmızı vərəqə görüb. O, ardınca ədalət təmsilçilərinə fiziki təzyiq göstərməyə cəhd edib və bu səbəbdən 5 matçlıq cəza ilə üzləşib. "Qarabağ" oyunçunun davranışına görə 3000 manat ödəməli olacaq. "Köhlən atlar" azarkeşlərin pirotexniki vasitədən istifadəsi ucbatından 1500 manat ziyana düşüb.

"Sabah"a isə beş futbolçu sarı vərəqə aldığından 700 manat, fanatların pirotexniki vasitədən istifadəsinə görə 1500 manat cərimə kəsilib.

Xatırladaq ki, rəqibini əlavə vaxtda 3:2 hesabı ilə üstələyən "Sabah" ölkə kubokunun sahibi olub.