La Liqanın 36-cı turunda ''Real'' ''Malyorka''nı qəbul etdi.

''Football-plus.az'' xəbər verir ki, Madrid nəhəngi xal itirəcəyi təqdirdə ''Barselona'' bu turun oyununu keçirmədən çempionluğu rəsmiləşdirəcəkdi.

68-ci dəqiqəyə qədər oyun ''Barsa''nın istədiyi ssenari ilə gedirdi. Amma qorxunc üstünlüyə malik olan ''Real'' vəziyyəti lehinə dəyişməyə müvəffəq oldu. Əvvəlcə Mbappe hesabı bərabərləşdirdisə, əsas vaxta əlavə olunmuş 5-ci dəqiqədə səhnəyə Xakobo Ramon çıxdı.

Bu mövsüm ilk dəfə start heyətində meydana çıxan 20 yaşlı müdafiəçi topu qapıçının üzərindən tora göndərməklə La Liqada ilk qolunu vurdu. Bu qol ''Barsa''nın çempionluğunu ən azı 24 saatlığa təxirə saldı. Komanda bu gün Kataloniya derbisində səfərdə ''Espanyol''a qalib gələcəyi təqdirdə çempionluğunu rəsmiləşdirəcək. ''Real'' qapıya 39 zərbə endirdi ki, bu da klubun 2003-cü ildən bu yana öz meydanındakı La Liqa matçında ən yaxşı göstəricisidi.

Bundan başqa ''Real'' 26 künc zərbəsi yerinə yetirməklə son 20 ildə La Liqada ilkə imza atdı. Mbappe bu mövsüm 40-cı qolunu vurdu. O, İvan Samoranonun rekordunu hələ ötən tur yeniləyərək ilk mövsümdə klub tarixində ən çox qol vuran futbolçuya çevrilmişdi. Bu dəfə isə Mbappe daha bir rekordu yenilədi. O, La Liqada 28-ci qolunu vurdu. Klub tarixində ilk mövsümdə heç bir futbolçu La Liqada bu qədər qol vurmamışdı! Əvvəlki rekord 1953/54-də 27 dəfə fərqlənən əfsanəvi Alfredo Di Stefanoya məxsus idi. Mbappe həm də XXI əsrdə İspaniya çempionatının rekorduna imza atdı. Amma ümumi rekord braziliyalı Ronaldoya məxsusdu. O, ''Barselona''da debüt mövsümü olan 1996/97-də çempionatda 34 dəfə fərqlənmişdi.

Onu da bildirək ki, ''Real'' buraxılan qolların sayı baxımından son 21 ilin ən pis mövsümünü keçirir. Komanda bu mövsüm artıq 60 rəsmi oyuna 76 qol buraxıb! 2003/04-də də ''kral klubu'' məhz 76 qol buraxmışdı. Bu mövsüm La Liqa klublarında yalnız ''Valyadolid'' rəsmi oyunlarda ''Real''dan daha çox (92) qol buraxıb.