Tək Avropada yox, digər zonalarda da Çempionlar Liqasında yarımfinal matçları keçirilir.

''Football-plus.az'' xəbər verir ki, Kriştiano Ronaldo və Lionel Messi yarımfinallarda uğursuzluğa düçar oldular.

Əvvəlcə Asiya zonasında son finalçı bəlli oldu. Kriştiano Ronaldo, Sadio Mane, Con Duran, Marselo Brozoviç kimi ulduzların şərəfini qoruduğu Səudiyyə Ərəbistanı təmsilçisi ''Əl-Nəssr'' Yaponiya təmsilçisi ''Kavasaki Frontale''ni qəbul etdi. Heyətinin dəyəri 175 milyon avro olan ''Əl-Nəssr'' 15 milyon avroluq rəqib qarşısında aşkar favorit sayılırdı. Üstəlik bu mövsüm bu turnirdə 1/4 finaldan etibarən bütün oyunlar Səudiyyə Ərəbistanında keçirilirdi. Yəni ''səkkizlər finalı'' formatında keçirilən pley-offlarda qalib bir oyunla müəyyənləşirdi. ''Əl-Nəssr'' bundan əvvəlki mərhələdə ''Yokohama Marinos''u darmadağın etmişdisə, bu dəfə Yaponiyanın digər təmsilçisi ilə bacara bilmədi. ''Kavasaki Frontale'' Yaponiya çempionatında yalnız 8-ci pillədə qərarlaşmasına baxmayaraq güclü rəqibini 3:2 məğlub edərək tarixində ilk dəfə bu turnirin finalına yüksəldi! Ronaldo bu görüşdə aktivinə nə qol yaza bildi, nə də məhsuldar ötürmə.

''Kavasaki Frontale'' həlledici oyunda Səudiyyə Ərəbistanının digər təmsilçisi ''Əl-Əhli'' ilə qarşılaşacaq. Bu oyundan bir neçə saat sonra okeanın o tayında isə Lionel Messi meydana çıxdı. KONKAKAF Çempionlar Liqasında ''İnter Mayami'' yarımfinalın cavab oyununda ABŞ-ın digər təmsilçisi ''Vankuver''i qəbul etdi. Bu turnirdə format fərqlidi və oyunlar ev-səfər prinsipi ilə keçirilir. Ötən həftə baş tutan ilk oyunda Mayami təmsilçisi səfərdə 2 cavabsız qolla məğlub olmuşdu. Fanatlar cavab matçında Messinin, eləcə də digər sabiq ''Barselona''lı ulduzlar Alba, Buskets, Suaresin sehrinə ümid edirdilər. Onların hamısı 90 dəqiqə meydanda oldular. Amma bu ümidlər doğulmadı və ''İnter Mayami'' geri dönüş edə bilmədi.

Düzdü, meydan sahibləri Albanın erkən qolu ilə hesabı açdılar və fasiləyə minimal üstünlüklə yollandılar. Amma ''Vankuver'' İkinci hissədə 20 dəqiqə aralığında 3 qol vuraraq inamlı şəkildə finala yüksəldi. Maraqlıdı ki, Ronaldo kimi Messi də belə vacib oyunda aktivinə nə qol yaza bildi, nə də məhsuldar ötürmə. Beləliklə, bu superulduzlar karyeralarının qürub çağında önəmli bir titul qazanmaq şansını əldən verdilər.