Arda Gülərin ''Real''da əsas heyətə düşə bilməməsi və lazımi qədər oyun praktikası qazanması müzakirə mövzusu olmaqda davam edir.

Xüsusilə də son dönəmlərdə Madrid nəhənginin nəticələri pisləşdiyindən bu mövzu yenidən aktuallaşıb. Çünki Arda şans qazandığı matçlarda heç də pis təsir bağışlamır. Bu arada ötənlərin məşhur müdafiəçisi, hazırda futbol eksperti kimi çalışan Rio Ferdinand da bu mövzuya münasibət bildirib. O, 11 milyon təqibçisi olan ''iks''də (tvitterdə) bununla bağlı paylaşım edərək Ardanın daha çox şans qazanmalı olduğunu bildirib: ''Real''ın problemi var. Toni Kroos artıq karyerasını başa vurub. Luka Modriçin isə yaşı irəliləyib və gənc deyil. İndiki komanda bir oyun qurucusuna, tempi müəyyənləşdirəcək futbolçuya ehtiyac duyur.

Düzdü, heyətdə mükəmməl futbolçular var. Amma komandada konkret bu rolu üzərinə götürə biləcək futbolçu qıtlığı hiss olunur. Arda Gülər gəncdi və fiziki cəhətdən bir qədər də inkişaf etməlidi. Amma elə futbolçular var ki, onlar üçün fiziki güc ön planda deyil. Çünki oyunları bunun üzərində qurulmayıb (Kroos, Modriç, Skoulz, Xavi, İnyesta kimi). Ardaya zaman verilsə və həmin mövqenin özəllikləri ətraflı anladılsa, məncə ''Real''ın ehtiyac duyduğu ritmi yarada, eləcə də oyunu nəzarət altında saxlaya bilər''. Ferdinandın bu paylaşımına mindən çox şərh gəlib.

Futbolsevərlərin çox böyük əksəriyyəti şərhlərdə Karlo Ançelottinin Ardaya qarşı haqsızlıq etdiyini irəli sürüblər. Türkiyə yığmasının üzvü bu mövsüm Madrid nəhəngində 37 rəsmi oyunda ümumilikdə 1388 dəqiqə meydanda olub və aktivinə 4 qol, 8 məhsuldar ötürmə yazıb.