Xəbər verdiyimiz kimi ''Trabzonspor''un U-19 komandası UEFA Gənclər Liqasında tarix yazaraq finala yüksəlmişdi. Bu kollektiv pley-offlarda ''Yuventus'', ''Atalanta'', ''İnter'', ''Zaltsburq'' kimi güclü rəqibləri mübarizədən kənarlaşdırmış və bu turnirdə finala yüksələn ilk Türkiyə təmsilçisi olmuşdu.

Dünən İsveçrənin Nyon şəhərində yerləşən ''Kolevrey'' İdman Mərkəzinin stadionunda baş tutan həlledici görüşdə qaradənizlilər ''Barselona''lı həmyaşıdları ilə qarşılaşdılar. Təəssüf ki, bu nağıl uğurlu sonluqla bitmədi.

Kataloniya nəhəngi 11-ci dəqiqədə İbrahim Diarra və 18-ci dəqiqədə Andres Sexudonun qolları ilə fasiləyə 2 topluq üstünlüklə yollandı. Türkiyə çempionu zaman-zaman güclü rəqibinə problemlər yaratsa da, ''Barsa'' fasilədən sonra da üstün oyununu davam etdirdi. 57-ci dəqiqədə Uqo Alba hesabı darmadağın həddinə çatdırdısa, 78-ci dəqiqədə Diarra özünün ikinci, komandasının dördüncü qolunu vurdu.

Son anlarda tribunadakı ''Trabzonspor''lu fanatların ''bu ölkə sizinlə qürur duyur'' təzahüratını səsləndirərkən Türkiyə təmsilçisi təsəlli qolunu vurmağa müvəffəq oldu. 88-ci dəqiqədə fərqlənən Bican Tibukoğlunun qoldan sonra göz yaşlarını saxlaya bilməməsi diqqət çəkdi.

Beləliklə, 4:1 qalib gələn ''Barselona'' bu turniri 3 dəfə qazanan yeganə klub statusunu ələ keçirdi. ''Blauqrana'' daha öncə 2013/14 və 2017/18-də də UEFA Gənclər Liqasının qalibi olmuşdu. Böyük alqış qazanan ''Trabzonspor''un isə bu mövsümkü nəticələri hələ uzun müddət unudulmayacaq.