''Trabzonspor''un U-19 komandası tarix yazmaqda davam edir.

''Football-plus.az'' xəbər verir ki, ötən il çempion olan və bu il Türkiyəni UEFA Gənclər Liqasında təmsil etməyə haqq qazanan ''Trabzonspor'' inanılmaz nəticələr əldə göstərməkdədi.

1/16 finalda evdə ''Yuventus''u 1:0 məğlub edən, 1/8 finalda evdə ''Atalanta''nı əsas vaxtı qolsuz bitən görüşdə penaltilər seriyasında üstələyən Türkiyə təmsilçisi bu dəfə doğma fanatları önündə İtaliyanın növbəti nəhəngi ''İnter'' ilə qarşılaşdı. Əvvəlki mərhələdə ''Bavariya''nı mübarizədən kənarlaşdıran milanlılar bu mövsüm üçün UEFA Gənclər Liqasının əsas favoritlərindən hesab olunurdular.

''Papara Park''da oyunu izləməyə 40368 azarkeş gəldi ki, bu da turnirin yeni rekordu kimi tarixə düşdü. Əvvəlki rekord Rusiyada qeydə alınmışdı. 2017/18-də ''Krasnodar'' - ''Real'' oyununa 32510 azarkeş gəlmişdi.

Bu turnirin 1/4 finalında oynayan ilk Türkiyə təmsilçisi olan qaradənizlilər bununla kifayətlənmədilər. ''İnter''lə görüş gözlənildiyi kimi çox gərgin və çətin keçdi. 39-cu dəqiqədə meydan sahiblərinin qapıçısı Erol Can Çolak Luka Topaloviçin penaltisini ayağı ilə dəf edərək qəhrəmana çevrildi.

Maraqlıdı ki, Erol Can Çolak komandanın 3-cü qapıçısıdı! İki əsas qapıçı - Onuralp Çevikkan və Ahmet Doğan Yıldırım zədəli olduğu üçün bu matçı buraxmalı olmuşdu. Oyunun taleyini həll edən qol isə 77-ci dəqiqədə vuruldu. Cəmi 2 dəqiqə öncə meydana çıxan Əkrəm Tərzi pressinqlə topu rəqibdən oğurladıqdan və bir qədər irəlilədikdən sonra zərbə mövqeyinə çıxdı. Forvard sol ayağı ilə topu qapıçı üçün əlçatmaz nöqtəyə göndərərək yerli fanatları sevincdən dəli olmaq həddinə çatdırdı.

Əvvəlki mərhələlərdə olduğu kimi yenə əla müdafiə olunan və qalan vaxta ''İnter''ə göz açmağa imkan verməyən ''Trabzonspor'' qələbə hesabını qoruyaraq adını ''dördlər finalı''na yazdırdı.

Həm yarimfinallar, həm də final matçı İsveçrənin Nion şəhərində keçiriləcək. Bu gün baş tutan digər 1/4 finalda evdə ''Olimpiakos''lu həmyaşıdlarını 1:0 məğlub edən ''Zaltsburq'' yarımfinalda ''Trabzonspor''un rəqibi oldu. Bu qarşılaşma aprelin 25-də keçiriləcək. 1/4 finalın digər iki oyunu sabah keçiriləcək.