UEFA Gənclər Liqasında ''Yuventus'', ''Atalanta'', ''İnter'' kimi güclü rəqibləri mübarizədən kənarlaşdıraraq əsil tarix yazan və yarımfinala yüksələn ''Trabzonspor''un U-19 komandası artıq İsveçrəyə yollanıb.

''Football-plus.az'' xəbər verir ki, bu turnirdə ''dördlər finalı'' İsveçrənin Nyon şəhərində keçiriləcək. Türkiyə təmsilçisi yarımfinalda Avstriya çempionu ''Zaltsburq''la qarşılaşacaq. Oyun cümə günü aprelin 25-də baş tutacaq və Bakı vaxtı ilə saat 16.00-da başlayacaq.

Bu arada UEFA-dan oyunöncəsi ''Trabzonspor''a pis xəbər gəlib. Belə ki, bundan əvvəlki mərhələdə Trabzonda ''İnter''ə qarşı baş tutan oyunda qələbə qolunun müəllifi olan Əkrəm Terzinin yarımfinalda komandasına kömək edə bilməyəcəyi məlum olub.

Həmin matçda ikinci hissənin gedişində meydana çıxan və 77-ci dəqiqədə vurduğu tarixi qolla italyanları məyus edən bu futbolçu qol sevinci zamanı formasını çıxardığı üçün sarı vərəqə almışdı. Əkrəm bu sarı vərəqə üzündən cəzalı duruma düşmüşdü. Trabzonda işıq üzü görən ''61 saat'' nəşrinin yazdığına inansaq, guya UEFA-dan ''Trabzonspor''a qarşıdakı oyunla bağlı ötürülən məlumatda sarı vərəqələrin ''dördlər finalı''ndan öncə sıfırlanacağı qeyd olunmuşdu.

Amma görünür, ya klub rəsmilər nəyisə səhv anlayıblar, ya da UEFA sonradan qərarını dəyişib. Çünki UEFA rəsmilərinin son dəyərləndirməsinin ardından Əkrəm Terzinin cəzasının davam etdiyi və onun yarımfinalda oynaya bilməyəcəyi məlum olub.