Türkiyə çempionatında zəif mövsüm keçirən və nəinki çempionluq mübarizəsindən, hətta “avorkubok zonası”ndan da çox geri düşən “Trabzonspor” üçün U-19 komandasının çıxışını kiçik bir təsəlli saymaq olar.

Bilindiyi kimi, “Trabzonspor”un U-19 komandası UEFA Gənclər Liqasında yarımfinala yüksələrək İsveçrənin Nion şəhərində baş tutacaq “dördlər finalı”nda oynamağa haqq qazanıb. Bu arada qaradənizlilərin başqanı Ərtuğrul Doğanın fərqli və gələcəyə yönəlmiş bir layihə üzərində çalışdığı məlum olub.

Belə ki, “61 saat” nəşrinin iddiasına görə Doğan 19 yaşlı futbolçuların sürətli inkişafına şərait yaratmaq və onlara dəstək olmaq məqsədi ilə Portuqaliyada bir klubu satın almaq barədə ciddi şəkildə düşünməyə başlayıb.

Xəbərdə klub prezidentinin məhz bu məsələ ilə məşğul olmaq üçün bir yönəticini Portuqaliyaya göndərdiyi qeyd olunub. Həmin yönətici Portuqaliyada bir sıra klub rəsmiləri ilə danışıqlar aparıb. Bu klublardan bəzilərinin səhmlərinin hissələrinə yiyələnməyin mümkün olduğu üzə çıxıb.

Söhbət ilk növbədə “Vizela”, “Şaviş” və “Pakuş Ferreyra” kimi aşağı liqa təmsilçilərindən gedir. Amma belə görünür ki, qısa müddətdə bu klublardan biri ilə anlaşmaq mümkün olmayacaq. Çünki bu klubların dəyəri “Trabzonspor” rəhbərliyinin gözlədiyindən daha yüksəkdi. Hər halda, danışıqların ən azı mövsümün sonuna qədər davam etdiriləcəyi gözlənilir.

Bu layihə baş tutacaqğı təqdirdə “Trabzonspor” U-19 komandasının bir sıra üzvlərini Portuqaliyaya göndərəcək. Orda onların inkişafı və böyük futbola uyğunlaşması prosesi daha sürətli şəkildə baş tutacaq. Bu gənclərə “Trabzonspor”un əsas komandasında şans qazanmaq çətindi. Halbuki Gənclər Liqası göstərdi ki, qaradənizlilərin akademiyasında həqiqətən də çox istedadlı gənclər yetişir.

Zarafat deyil, “Trabzonspor” yarımfinala gedən yolda “Yuventus”, “Atalanta” və “İnter” kimi İtaliya nəhənglərini mübarizədən kənarlaşdırdı.