"Qalatasaray''ın üzvü konyalıların etirazı ilə bağlı nə dedi?
''Qalatasaray'' Türkiyə kubokunun yarımfinalında səfərdə ''Konyaspor''u 5:1 darmadağın edərək rahat şəkildə finala yüksəldi.
''Football-plus.az'' xəbər verir ki, matçın ardından ''Cim-Bom''un müdafiəçisi Əbdülkərim Bardakcı konyalı fanatlardan narazılıq etdi. Yerli fanatlar oyunboyu bu futbolçunu fitə basaraq ona etirazlarını bildirdilər.
Məsələ burasındadı ki, əslən Konyadan olan Əbdülkərim məhz ''Konyaspor''un yetirməsidi və uzun illər bu klubda forma geyib. 2022-ci ildə isə o, Konya klubundan ''Qalatasaray''a transfer olunub. Ötən mövsüm 30 yaşlı futbolçu superliqada məhz ''Konyaspor''la oyunda dubl etmişdi. Onun ilk qoldan sonra sevinməsi konyalı fanatların xoşuna gəlməmişdi. Çox güman, indi bu futbolçuya yönələn etirazlar da bununla bağlıdı. Əbdülkərim matçın ardından bunları dedi:
''Bu mövzuya xüsusi toxunmaq istəyirəm. Mən ''Konyaspor''da kapitan sarğısı daşımış futbolçuyam. Konyaya olan sevgimə görə ''Qalatasaray''da ''42'' nömrəli forma ilə oynayıram. Bu gün oyuna anam, həyat yoldaşım və uşaqlarım da gəlmişdi. Mənə yönələn bu etirazları anlamadım. Mən qürurla Konyanı təmsil edirəm və bu şəhəri də çox sevirəm. Bunu da hər kəs bilir. Düzdü, ötən mövsüm qol vurduqdan sonra sevinmişdim. Həmin vaxt həm gözəl, həm də vacib qol vurmuşdum. Bu məqamın emosiyalarına qapılaraq sevinmişdim. Amma bu o demək deyil ki, mən Konyanı sevmirəm. Bu günkü etirazlar məni çox üzdü. Hətta bəzən qulaqlarıma, eşitdiklərimə inana bilmədim. Deməyə başqa söz tapmıram. Bir daha deyirəm ki, bu şəhəri sevirəm. ''42'' nömrəni geyməkdə və həqiqi konyalıları qürurlandırmaqda davam edəcəm''.
Digər xəbərlər
