Braziliyanın B seriyasında keçirilən ''Qoyas'' - ''Villa Nova'' oyunu həm məhsuldar, həm də maraqlı alındı.

''Football-plus.az'' xəbər verir ki, meydan sahibi ''Qoyas'' iki dəfə hesabda önə keçsə də, ''Villa Nova'' hər iki halda bərabərlik qolunu vurmağa müvəffəq oldu və nəticədə görüş 2:2 hesabı ilə yekunlaşdı.

Qonaqlar bərabərlik qolunu 89-cu dəqiqədə vurdular və məhz bundan sonra böyük müzakirələrə səbəb olan bir olay yaşandı. Qolun müəllifi Arilson sevinərkən komanda yoldaşı Elias da ona yaxınlaşaraq əllərini qulaqlarına apardı. Daha çox Mauro İkardinin adı ilə bağlı olan bu qol sevincindən dünyanın bir çox ölkələrində dəfələrlə istifadə olunub. Elə İkardi özü də Türkiyədə az qala vurduğu hər qoldan sonra məhz bu cür sevinir. Amma ''Qoyas'' - ''Villa Nova'' matçının hakimi qəribə şəkildə bu sevinci rəqib fanatları təxribata çəkmək kimi qiymətləndirdi. Bu üzdən o, Eliasa sarı vərəqə göstərdi. Daha öncə bir sarı vərəqəsi olan bu futbolçu meydanı tərk etmək məcburiyyətində qaldı.

Bu epizod Braziliya futbol ictimaiyyətində heç də birmənalı qarşılanmadı. Çoxlarının fikrincə, hakim futbolçuya qarşı hədsiz sərt mövqe tutdu və bu cür qol sevincində qeyri-adi heç nə yoxdu. Ümumiyyətlə, son vaxtlar Braziliya futbolundan belə qəribə xəbərlər tez-tez gəlir. Bir müddət öncə Braziliyada ən çox müzakirə olunan mövzu futbolçunun iki ayağı ilə topun üzərinə çıxmağa haqqının olub-olmaması idi. Təsəvvür edin, Braziliyada bu cür hərəkətə yol verən futbolçuya sarı vərəqə göstərilir!

İki həftə öncə ''Korintians'' - ''Palmeyras'' matçının son anlarında Memfis Depayın iki ayaqla topun üzərinə çıxması çox böyük bir qalmaqala səbəb olmuşdu. ''Palmeyras''lılar bu hərəkətə görə tanınmış niderlandlı futbolçuya etirazlarını bildirmiş və aləm bir-birinə dəymişdi. Hakim əsas vaxta 16 dəqiqə əlavə etməli olmuşdu.

Maraqlıdı ki, ertəsi gün Braziliyada Hakimlər Komitəsi tərəfindən bu cür epizodla bağlı rəsmi qərar açıqlandı. Orda qeyd olundu ki, bu hərəkət rəqibə hörmətsizlik mənasını verir. Topun üzərinə iki ayağı ilə çıxan futbolçuya bundan sonra sarı vərəqə göstəriləcək və rəqib komandanın lehinə cərimə zərbəsi təyin ediləcək.

Bu qərara Neymar başda olmaqla bir çox ulduzlar və fanatların böyük əksəriyyəti etiraz etdilər. Neymar öz səhifəsində ''futbol getdikcə daha da darıxdırıcı olmağa başlayır'' sözünü yazdı.