Türkiyə klubları borcları ödəməkdən boyun qaçırmaqdan, FİFA isə onlara cəza verməkdən bezmir.

Yenə Türkiyə elitasında çıxış edən bir klubla bağlı transfer cəzası xəbəri gəlib. Bu dəfə söhbət “Konyaspor”dan gedir. Onsuz da superliqada uğurlu mövsüm keçirməyən və yalnız elitada qalmaq uğrunda mübarizə aparan Konya təmsilçisinə daha bir zərbəni FİFA vurub.

Qurumun rəsmi saytında yerləşdirilən xəbərdə aprelin 10-dan başlamaqla “ağ-yaşıllar”a üç dönəm transfer cəzası verildiyi qeyd olunub. Səbəb isə iki futbolçunun pulunu ala bilmədiyinə görə “Konyaspor”dan FİFA-ya şikayət etməsidi. Türkiyə mətbuatına inansaq, bu futbolçular Aleksandru Çikıldau ilə Mame Diufdu. Rumıniyalı Çikıldau, bilindiyi kimi, 2021-ci ildə “Qalatasaray”a böyük ümidlərlə transfer olunsa da, qısa müddət ərzində onun səviyyəsinin İstanbul nəhənginə uyğun olmadığı üzə çıxmışdı. 27 yaşlı futbolçu ötən mövsümü “Konyaspor”da keçirmiş və 2024-ün yayında Türkiyədən ayrılmışdı. Seneqallı Mame Diuf isə 2022/23-ü Konyada keçirib.

Ötən mövsüm “Göztəpə”nin şərəfini qoruyan 37 yaşlı forvard hazırda 1-ci liqa təmsilçisi “Keçiörəngücü”də forma geyir. “Konyaspor”un bu futbolçulara ayrı-ayrılıqda nə qədər borcunun olması barədə məlumat yoxdu. Amma klub prezidenti Ömər Korkmaz 200 min avro ilə problemi yoluna qoymağın mümkün olduğunu qeyd edib:

Qeyd edək ki, “Konyaspor” transfer cəzası alan 6-cı superliqa təmsilçisidi! “Samsunspor”, “Antalyaspor”, “Kayserispor”, “Adana Dəmirspor” və “Hatayspor” da FİFA-nın “qara siyahı”sındadı. Bu klublar qadağa üzündən qışda transfer həyata keçirə bilməmişdilər. Bundan başqa, aprelin 1-dən bəri Türkiyənin aşağı liqalarında çıxış edən ümumilikdə 5 kluba da cəza verilib.

Söhbət 1-ci liqa təmsilçiləri “Ankaragücü”, “Fatih Karagümrük”, “Ümraniyəspor”, 2-ci liqa təmsilçisi “Altay” və 3-cü liqada çempionluğunu rəsmiləşdirmək üzrə olan “Bursaspor”dan gedir.