Türkiyənin tanınmış futbolçularından olan, amma son dönəmlərdə gözdən itən Sərdar Əziz karyerası ilə bağlı mühüm qərar qəbul edib.

''Football-plus.az'' xəbər verir ki, təcrübəli müdafiəçi mövsümün sonunda butslarını birdəfəlik mismardan asmaq qərarına gəlib. ''Bursaspor''un yetirməsi olan və 2016-ya qədər bu klubda çıxış edən Əziz daha sonra ''Qalatasaray''a keçmiş və burda 2017/18-də çempionluq sevinci yaşamışdı.

Növbəti mövsümün gedişində o, Fatih Terim ilə problem yaşayınca qış transfer dönəmində əks cəbhəyə - ''Fənərbaxça''ya yollanmağa üstünlük vermişdi. 2022-dən etibarən tez-tez zədələnən Sərdar əsas heyətdəki yerini də itirməyə başladı.

Ötən mövsüm superliqada cəmi 12 oyun keçirən 34 yaşlı futbolçu Joze Mourinyonun gəlişindən sonra ümumiyyətlə gözdən düşdü. Onun həm mövsümün əvvəlində, həm də qış fasiləsində klubdan ayrılacağı güman edilirdi. Amma belə olmadı. İstədiyi təklifləri almayan Sərdar özünə klub tapa bilmədi. O, Mourinyonun da planlarına daxil deyil.

Təsadüfi deyil ki, bu futbolçu cari mövsüm heç bir rəsmi oyunda forma geyməyib. Türkiyə mətbuatının iddiasına görə Sərdar Əziz mövsümün sonunda karyerasını bitirmək niyyətindədi. Bir ara Türkiyə yığmasında da forma geymiş bu futbolçu Türkiyə çempionatında 171-i ''Bursaspor''da, 135-i ''Fənərbaxça''da və 51-i ''Qalatasaray''da olmaqla forma geydiyi 357 qarşılaşmada aktivinə 27 qol, 15 məhsuldar ötürmə yazıb. ''Qalatasaray''dan başqa Sərdar 2009/10-da ''Bursaspor''la da çempion olub.

Amma həmin mövsümdə bu futbolçu adı iştirak ərizəsində olsa da, çempionatda meydana çıxmamışdı. Bundan başqa Əziz ölkə kuboku və ölkə superkubokunun da qalibidi.