Türkiyədə bu il ''Bursaspor'', ''Əskişəhərspor'' kimi tarixi ənənələri olan klublar belə desək, ölü nöqtədən tərpənmək qərarına gəlib.

4-cü divizionda mübarizə aparan və öz qrupunda lider olan ''Bursaspor''un bu mövsüm ev oyunlarında bir neçə dəfə həmin turnirin azarkeş rekordu qırılıb. Buna bənzər xəbər indi də Əskişəhərdən gəlib. Son illər sürətli eniş yaşayan bu komanda hazırda bölgələr üzrə həvəskarlar liqasında çıxış edir. Ötən bazar günü ''Əskişəhərspor'' öz meydanında ''Manavqat Bələdiyəspor''u 2:1 hesabı ilə məğlub etdi.

Təsəvvür edin ki, bu qarşılaşmanı izləmək üçün tribunaya 30328 azarkeş gəlmişdi! Bu, bölgələr üzrə həvəskarlar liqası tarixinin yeni azarkeş rekordudu. Əvvəlki rekord 2015-in fevralında oynanılan ''Kocaelispor'' - ''Büyükçekmece Bələdiyəspor'' oyununda qeydə alınmışdı. Həmin vaxt Kocaelidəki stadiona 20745 azarkeş gəlmişdi. Maraq üçün ''EsEs''in öz qrupunda 11 oyuna 30 xal topladığını və ən yaxın rəqibini 3 xal qabaqlamaqla lider olduğunu bildirək.

ƏLİ