Mişi Batşuayi son dönəmlərdə maraqlı rekordlarla gündəmə gəlir.

Bilindiyi kimi təcrübəli belçikalı forvard son illəri Türkiyədə keçirmişdi. ''Football-plus.az'' xəbər verir ki, əvvəlcə ''Beşiktaş''ın, sonra ''Fənərbaxça''nın və bu mövsümün ilk dövrəsində ''Qalatasaray''ın şərəfini qorumaqla Batşuayi hər üç İstanbul nəhəngində forma geymiş ilk əcnəbi futbolçu kimi adını Türkiyə futbolu tarixinə yazdırmışdı. ''Cim-Bom''da Okan Burukun gözünə girə bilməyən 31 yaşlı futbolçu qış fasiləsində Almaniyaya yollanaraq ''Ayntraxt''la müqavilə imzaladı.

Batşuayi frankfurtluların heyətində indiyə qədər 6 rəsmi oyuna 2 qol vurub. O, martın 13-də Avropa Liqasının 1/8 finalında ''Ayaks''la cavab matçının (4:1) 77-ci dəqiqəsində meydana çıxmaqla adını futbol tarixinə yazdırmış oldu.

Belə ki, Batşuayi 9 fərqli klubun heyətində avrokuboklarda forma geyən ilk futbolçu kimi tarixə düşdü! Bu futbolçu ''Ayntraxt''dan öncə ''Standard'', ''Marsel'', ''Çelsi'', Dortmund ''Borussiya''sı, ''Valensiya'', ''Beşiktaş'', ''Fənərbaxça'' və ''Qalatasaray''ın da heyətində avrokuboklarda forma geymişdi. Bu klublarda o, 79 avrokubok oyununda 24 qol vurub. Əvvəlki rekord Nikolya Anelkaya məxsus idi.

Bir dönəm ''Fənərbaxça''da da forma geymiş sabiq fransalı forvard 8 fərqli klubun heyətində avrokuboklarda çıxış etmişdi.

ƏLİ