“Sumqayıt” Misli premyer-liqasının səfərdə 27-ci turunda “Turan Tovuz”a 2:1 hesabıyla qalib gəldi.

“Football-plus.az” xəbər verir ki, oyundan sonra qonaqların baş məşqçisi Vaqif Cavadov jurnalistlər önünə çıxıb.

- Gərgin oyun keçdi. Hər iki komanda qalib gəlmək istəyirdi. Bu gün biz daha istəkliydik. Rəqib çox yaxşı komandadı. Berdıyev yaxşı komanda yığıb, onlara uğurlar arzulayıram.

- Alan Diasın qayıdışı çox kömək etdi?
- Bəli. Miloş Miloviç vərəqələrdən oyunu buraxırdı. Bütün futbolçularıma təşəkkürümü bildirmək istəyirəm. Məğlubiyyətlərin olmasına rəğmən, futbolçular və rəhbərliklə bir olduq.

- 11 oyun qolsuzluq seriyanız oldu. Komandaya tənqidlər var idi. Həmin tənqidlərin son iki oyunda nə dərəcədə təsiri oldu?
- Bu hər bir gənc məşqçinin karyerasında ola bilər. Rəhbərlik və futbolçularla bir-birimizi yaxşı başa düşdük. Futbolçularıma inanıram. Çətin bir zolaqdan keçdik. Son 3 oyunda futbolçularım bunu nümayiş etdirdi.

- Qapıda Xəyal Fərzullayevə şans verdiz. Bu qərar nədən irəli gəlir?
- Mən akademiyanın futbolçularına üstünlük verirəm. Mehdi Cənnətov əsas qapıçımızdı. Keçən ildən onun da üzərində təzyiq var. İstirahət lazım idi. Düşündük ki, bir qədər dincəlsin. Gənc qapıçı da özünü son üç oyunda doğruldur.

- Rəşad Əzizli niyə oynamadı?
- Xəyala inamım daha çox idi. Gənc futbolçulara bir siqnaldı ki, onların şansı var.

- Komandada işlər yoluna düşdümü?
- Həmişə yolunda idi. Komandada hər şey qaydasındadı. Öz yolumuza davam edəcəyik.

- Bu gün “Turan Tovuz” 15 künc zərbəsi yerinə yetirdi və yalnız biri təhlükəli alındı. Bunun üzərində çalışmışdız?
- Əlbəttə, biz bunun üzərində çalışırıq. Alına və ya alınmaya bilər.

ƏSƏD SEYİDOV