Dörd millətin turniri daha olmayacaq
Milli Hokkey Liqasının (MHL) komissar müavini Bill Deyli bildirib ki, bu qurum bir daha Dörd millətin turnirini keçirməyəcək.
"Football-plus.az" xəbər verir ki, MHL bundan sonra Dünya kubokunun təşkilinə daha böyük diqqət ayıracaq. Xatırladaq ki, Kanada, ABŞ, İsveç və Finlandiya yığmalarının qatıldığı Dörd millətin turniri fevralın 12-21-i aralığında Monreal və Boston şəhərlərində keçirilib. Kanada yığması finalda ABŞ-yə 3:2 hesabıyla qalib gəlib. Dünya kuboku isə 8 yığmanın iştirakı ilə 2028-ci ildə keçiriləcək.
Beynəlxalq Hokkey Federasiyasının fəxri prezidenti Rene Fazel isə ABŞ prezidenti Donald Trampın gərginlik yaradan açıqlamasına toxunub:
“Yenicə Kanada və ABŞ yığmalarının finalda qarşılaşdığı turnir başa çatdı. Cənab Trampın Kanadanın ABŞ-nin tərkibinə daxil olması ilə bağlı fikirlər qarışıq bəzi ifadələr işlətdiyini bilirik. Belə fikirlərin müəyyən gərginlik yaratdığından xəbərdarıq”.
Məlum olduğu kimi, Tramp yanvarın sonunda Kanadanın suveren dövlət sayıla bilməyəcəyini deyib, çünki Amerikadan tam asılıdı. Yeni prezident hətta dəfələrlə Kanadaya 51-ci ştat kimi Amerikanın tərkibinə daxil olmağı təklif edib.
Digər xəbərlər
