Qarabağ (Ağdam) – Sabah (Bakı) 1:1
1. Şahrudin Məhəmmədəliyev - 5,5 
55. Bədavi Hüseynov (k) - 5,0 
13. Bəhlul Mustafazadə - 6,0 
27. Toral Bayramov - 5,5
10. Abdulla Zubir - 6,5
66. Patrik Andrade - 5,5
(24. Aleksey İsayev, 79) – qiymətsiz
7. Yassin Benzya - 6,0 
9. Kadi Borges - 6,0 
2. Mateus Silva - 6,0 
19. Redon Cica - 5,5 
(90. Nəriman Axundzadə, 69) - 4,5 
15. Leandro Andrade - 6,0 
(21. Aleksey Kaşuk, 79) - qiymətsiz
Ehtiyat oyunçular
99. Mateus Koxalski
97. Fabian Buntiç
22. Musa Qurbanlı
29. Marko Veşoviç
11. Emmanuel Addai
Baş məşqçi: Qurban Qurbanov
Komandanın ən yaxşısı: Abdulla Zubir

92. Stas Pokatilov - 6,0 
2. Amin Seydiyev (k) - 6,0 
5. Rəhman Daşdəmirov - 6,0 
6. Abdulax Xaybulayev - 5,5 
88. Xəyal Əliyev - 6,0 
(9. Anatoli Nuriyev, 85) – qiymətsiz
7. Boyan Letiç - 5,5
(3. Con İrasabal, 69) - 4,5
4. Sofian Çakla - 5,0 
18. Pavol Şafranko - 5,5
(99. Neqoş Kupusoviç, 69) - 4,5
70. Cesse Sekidika - 6,5 
(20. Coy-Lens Mikels, 72) - 5,0
13. İvan Lepinitsa - 6,0
33. Umarali Raxmonaliyev - 6,0 
(11. Kahim Parris, 85) – qiymətsiz
Ehtiyat oyunçular
55. Nicat Mehbalıyev
17. Tellur Mütəllimov
77. Şakir Seyidov
22. Abdulla Rzayev
15. Seymur Məmmədov
32. Elgün Dünyamalıyev
12. Vinsent Till
Baş məşqçi: Vasili Berezutski
Komandanın ən yaxşısı: Cesse Sekidika

Qollar: A.Zubir, 17 (1:0, L.Andrade). C.Sekidika, 35(1:1, İ.Lepinitsa).
Vərəqələr: T.Bayramov, 38 (qeyri-idman hərəkəti). İ.Lepinitsa, 54 (qeyri-idman hərəkəti). S.Çakla, 64 (qeyri-idman hərəkəti) – sarı.
Hakimlər: ƏLİYAR AĞAYEV, Zeynal Zeynalov, Akif Əmirəli, Kamranbəy Rəhimov (hamısı Bakı).
VAR hakimi: Rəşad Əhmədov (Mingəçevir).
VAR hakiminin köməkçisi: Eyyub İbrahimov (Bakı).
Hakim-inspektor: Ömər Paşayev (Bakı).
AFFA nümayəndəsi: Elgiz Abbasov (Masallı).
22 fevral. Bakı. Tofiq Bəhramov adına Respublika stadionu. 500 tamaşaçı (31200 yerlik).
Birinci hissəyə 1, ikinci hissəyə 3 dəqiqə əlavə olunub.
Oyunun qiyməti: 6,0.

“Bəhramov”da keçirilən matç hər iki komanda üçün xüsusi əhəmiyyət daşıyırdı. “Qarabağ” ən yaxın izləyicisi “Araz-Naxçıvan”la xal fərqini artırmaq istəyirdisə, “Sabah” “Turan Tovuz”a yaxınlaşmaq niyyətindəydi. Bu komandaların cari mövsümdə keçirilən ilk iki oyununa gəlincə, “Qarabağ” evdə 3:2 hesabıyla qələbə qazanmış, Masazırdakı qarşılaşma heç-heçə (1:1) bitmişdi. Bir qədər irəli gedib qeyd edək ki, bu oyunda da həmin hesab qeydə alındı.

İlk təhlükəli vəziyyəti meydan sahibləri yaratdı. 4-cü dəqiqədə Kadinin cərimə zərbəsindən qapı qarşısına ötürməsini Leandro Andrade başla tamamlamaq istəsə də, top qapıdan aralı keçdi. Zubir – Kadi - Cica kombinasiyasınıda sonuncunun zərbə endirməsinə Pokatilov mane oldu. 15-ci dəqiqədə Cica yenə də Pokatilov səddini keçə bilmədi. Bir dəqiqə sonra Sekidika uzaqdan bəxtini sınasa da, zərbəsi qeyri-dəqiq oldu. 17-ci dəqiqədə “Qarabağ” hesabı açdı. Xaybullayevdən topu ələ keçirən Zubir Benzyaya ötürmə verdi. Benzya – Lenadro - Zubir kombinasiyasını sonuncu dəqiq zərbə ilə tamamladı - 1:0. Amma 19-cu dəqiqədə “Sabah” hesabı bərabərləşdirməyə yaxın oldu. Toral Bayramovdan sıyrılan Xəyal Əliyev qapı qarşısına ötürmə versə də, Raxmonaliyevin başla zərbəsi qapıdan aralı keçdi.

“Bayquşlar” qol istəyinə 35-ci dəqiqədə çatdı. Mateusla Kadinin Letiçdən topu “oğurlamaq” istəyi alınmadı. Boyan yerdə qalmasına baxmayaraq, Lepinitsaya ötürmə verdi. İvan topu dərhal Sekidikaya çatdırdı. Cesse də uzaq məsafədən gözəl zərbə ilə topu tora qovuşdurdu - 1:1. Hissənin sonuna qədər qarşılıqlı hücumlar davam etdi. 38-ci dəqiqədə Kadinin zərbəsini qapıçı dəf etdi.

İkinci hissəyə “Sabah” təhlükəli hücumlarla başladı. Şafrankonun ardından Seydiyevin zərbəsini də Şahruddin dəf etməyi bacardı. 56-cı dəqiqədə Toral cərimə zərbəsindən birbaşa qapını “nişan alsa” da, Pokatilov yerində idi. 72-ci dəqiqədə Bədavi ötürmədə səhvə yol verdi. Topu ələ keçirib irəliləyin Xəyalın zərbəsində azacıq dəqiqlik çatmadı. 84-cü dəqiqədə Bədavi yenidən kobud səhvə yol verdi. Amma Xəyalın zərbəsi bu dəfə də qeyri-dəqiq oldu. 90-cı dəqiqəsində “bayquşlar” qələbə topunu vura bilərdi. Toralın ötürmə səhvindən yararlanan Mikels sürətlə cərimə meydançasına daxil oldu, İsayevlə Bədavidən yayınıb zərbə endirsə də, top az fərqlə qapının üstündən keçdi. Coy-Lens komandasının qəhrəmanı olmaq imkanını qaçırdı. Görünür, Berezutski onu əbəs yerə ehtiyatda saxlamır.

Gözdən qaçmadı 
* Oyunu izləyənlər arasında AFFA İcraiyyə Komitəsinin üzvləri Balakişi Qasımovla Maqsud Adıgözəlov da var idi. 
* Vasili Berezutski oyundan sonra Qurban Qurbanovun əlini sıxmadı.
* “İmarət Tayfa”, “Qarabağ Ordu” və “Soldati di Sabah” azarkeş qrupları tribunada öz yerini almışdı.

ƏSƏD SEYİDOV