Kis və Sinner qalib gəldi - İCMAL
Yanvarın 12-də start götürən “Australian Open”ə bazar günü yekun vuruldu. Əvvəlcə qadınların turnirində final oyunu keçirildi.
29 yaşlı amerikalı Medison Kis iki saat sürən mübarizə sonucunda dünyanın 1-ci raketkası Arina Sobolenkonu məğlub etdi. Son iki ildə bu turnirin qalibi olan belaruslu bu dəfə titulunu qoruya bilmədi. Sobolenko məğlubiyyətə çox emosional reaksiya verdi. Ənənəvi əlsıxmadan sonra komandasının üzvlərinə nəsə dedi və raketkasını qırdı. Ardından dəsmalı üzünə tutdu ki, göz yaşlarını gizləsin.
Kis isə karyerasında ilk dəfə “Böyük dəbilqə” turnirinin kubokunu başı üzərinə qaldırdı.
Ümumiyyətlə, o, 2000-ci ildən bəri “Australian Open”də fərdi yarışda qalib gələn 5-ci amerikalıdı. Əvvəllər bunu Lindsey Devenport (2000), Cennifer Kapriati (2001, 2002), Serena Uilyams (2003, 2005, 2007, 2009, 2010, 2015, 2017) və Sofya Kenin (2020) bacarıb.
Kişilərin turnirində Yannik Sinner qalib gəldi. 23 yaşlı italiyalı tennisçi finalda 2 saat 45 dəqiqə ərzində Almaniya təmsilçisi Aleksandr Zverevin müqavimətini qırdı. Sinner ardıcıl 2-ci dəfə “Australian Open”qalibi oldu, o, həmçinin ötənilki “US Open”də ATP-nin illik Yekun turnirində də heç kimə aman verməyib.
Maraqlı məqam odu ki, Zverev finalların uğursuzudu. O, karyerasındakı 3-cü “Böyük dəbilqə” finalında da uduzdu. Buna qədər 2020-ci ildə “US Open”də, ötən il isə “Rolan Qarros”da uduzmuşdu. 27 yaşlı Zverev olimpiya çempionu və Yekun turnirinin ikiqat qalibidi.
final
kişilər, fərdi
Sinner (İtaliya, 1) - Zverev (Almaniya, 2) 6:3, 7:6 (7:4), 6:3
kişilər, cütlər
Heliovaara/Patten (Finlandiya/B.Britaniya, 6) – Bolelli/Vavassori (İtaliya, 3) 6:7 (16:18), 7:6 (7:5), 6:3
qadınlar, fərdi
Kis (ABŞ, 19) - Sobolenko (Belarus, 1) 6:3, 2:6, 7:5
qadınlar, cütlər
Sinyakova/Taunsend (Çexiya/ABŞ, 1) – Si Suvey/Ostapenko (Çin Taybeyi/Latviya, 3) 6:2, 6:7 (4:7), 6:3
mikst
Qadeki/Pirs (Avstraliya) – Birrell/Smit (Avstraliya) 3:6, 6:4, 10:6
Reaksiyalar
Arina Sobolenko:
“Medison, bu necə turnir idi! Bu mükafatı qazanmaq üçün çox savaşdın, bu gün qeyri-adi oyun göstərdin. Səni və komandanı təbrik edirəm – qələbə haqqınız idi. Qələbən ləzzət alın. Bu il məndə alınmasa da, gələn il daha güclü qayıdacam. Möhtəşəm atmosferə görə sağ olun”.
Medison Kis:
“Komandama “sağ ol” deyirəm. Deyəsən, ağlamalı olacam... Bu titulu hədsiz çox istəyirdim. Mən artıq bir dəfə “Böyük dəbilqə”nin finalında oynamışdım, onda nəticə uğursuz oldu. Bir daha belə şans qazanıb-qazanmayacağımı bilmirdim. Ancaq komandam həmişə mənə inanırdı. Burda olmaq, mükafatı qazanmaq, bunu həyat yoldaşımın gözü önündə bacarmaq... Hamınızı çox sevirəm”.
Aleksandr Zverev:
“Bu mükafatın yanından durmaq və ona toxunmaq imkanının olmaması – çox pisdi. Yannik, təbrik edirəm, bu qələbəni haqq etdin, sən dünyanın ən yaxşı tennisçisisən, özü də böyük fərqlə. Bu gün daha yaxşı mübarizə aparacağıma ümid edirdim, ancaq sən hədsiz yaxşı oynadın. Komandam sağ olusn. Hər şeyi düzgün etməyə çalışırıq, ancaq mən yetərincə yaxşı oynamadım – bütün məsələ bundan ibarətdi (gülür). Azarkeşlər də sağ olsun, möhtəşəm idilər. Nə vaxtsa bu mükafatı başım üzərinə qaldırıb-qaldırmayacağımı bilmirəm. Ancaq cəhdlərimi davam etdirəcəm. Gələn il görüşərik”.
Yannik Sinner:
“Bu mükafatı ikinci dəfə qazanmaq, sadəcə, qeyri-realdı! Komandama və dünyanın hər yanından məni dəstəkləyənlərə “sağ ol” deyirəm. Aleksandr Zverev də qeyri-adi oyun göstərdi. Monakodakı evim yetərincə kiçikdi, bu üzdən kuboku valideynlərimin İtaliyadakı evində saxlayacam”.
Fakt
Sinner mükafat fondundan 2,2 milyon dollar qazandı. Bununla da karyerası boyunca turnirlərdən qazandığı pulu 39 milyon 448 min 938 dollara çatdıran italiyalı tennisi Karlos Alkarasla (38 milyon 274 min 924 dollar) Sten Vavrinkanı (37 milyon 371 min 131 dollar) arxada qoydu. Bu siyahıda lider Novak Cokoviçdi (186 milyon 235 min 814 dollar).
Digər xəbərlər
