Mbappe yaşıl meydandan kənarda da qalib gəldi!
“Real”ın hücumçusu Kilian Mbappe üçün xoş xəbərlə açıldı: fransalı ulduzun İsveçdə zorlama və seksual qısnamada iştirakı ilə bağlı şübhələrə əsaslanan iş bağlanıb. Artıq futbolçu və fanatları rahat nəfəs ala bilər.
Təbii ki, iş lazımi sübutların olmaması üzündən qapanıb. İlkin istintaqa rəhbərlik edən prokuror Marina Çirakova bu xəbəri ictimaiyyətə açıqlayıb:
“Təhqiqatın gedişində əsaslı şəkildə zorlamada, həm də iki seksual qısnama cəhdində suçlanan şəxs aşkar olunub. Ancaq bizim dəyərləndirməmizə görə, işi davam etdirmək üçün yetərincə sübut yoxdu, bu üzdən təhqiqat başa çatıb. Göstərilən şəxsə bu cinayətin törədilməsi ilə bağlı ittiham irəli sürülməyib”.
Xatırladaq ki, oktyabrın 14-də “Aftonbladet” və “Expressen” qəzetləri Mbappenin Stokholma səfərinin ardından İsveçdə zorlama ittihamı üzrə təhqiqatın başladığını xəbər vermişdi. Yerli KİV bildirirdi ki, Kilian dostlarıyla birgə Fransa milli komandasının Millərlər Liqasında İsraillə keçirdiyi oyun vaxtı İsveç paytaxtına baş çəkib. O, restoranda və gecə klubunda olub, növbəti gün isə vətəninə qayıdıb.
Polis münaqişəni aydınlaşdırmaq üçün fransalı ulduzun qaldığı oteli ziyarət edib. “TV4 News” iddia edirdi ki, zərərçəkən qadın tibbi yardım üçün müraicət edib və Mbappeni zorlamada suçlayıb. “L'Equipe” isə yazırdı ki, bu qalmaqal fonunda Kilianda mental problemlər yaranıb. Amma futbolçu bu ehtimalı qətiyyətlə rədd etdi:
“Başverənlər məni qətiyyən narahat etmir. Heç bir çağırış almamışam, mən də hamı kimi mətbuatdan oxuyuram. Çox təəccübləndim. Bəzən heç vaxt ola biləcəyini düşünmədiyin hadisələr də baş verir. İstintaq orqanlarından heç bir çağırış almamışam. İsveç hakimiyyəti bu mövzuda mənə heç nə deməyib. Bu hadisəyə qarışacağım yoxdu. Sadəcə, anlaşılmazlıqdı. Hədsiz çox səs-küy var. Ancaq mənim həmişə bir niyyətim olub – işə köklənmək, bütün bunların nə ilə bitəcəyini gözləmək”.
Bildiyiniz kimi, 25 yaşlı hücumçu yay “transfer pəncərəsi”ndə PSJ-dən “Real”a keçib. Madrid klubunun heyətində bütün turnirlərdə 21 oyun keçirib, 11 qol vurub, 2 məhsuldar ötürmə verib. “Atalanta” ilə dekabrın 10-da keçirilən Çempionlar Liqasının oyununda isə zədələnərək yerini Rodriqoya verib. Onun təxminən 10 günlüyə sıradan çıxdığı bildirilir. Kilian sol budunun arxa əzələsi ilə bağlı problem yaşayır.
Digər xəbərlər
