Dünya futbol ictimaiyyəti artıq bir neçə gündü Kilian Mbappe ilə bağlı müxtəlif iddiaların təsiri altındadı.

Əvvəlcə onun gələn il “Qızıl top”u qazanmaq şansını artırmaq üçün Fransa yığmasının yalnız vacib oyunlarında iştirak etmək qərarına gəldiyi və bunu baş məşqçi Didye Deşamdan xahiş etdiyi söylənildi. Sonra ortaya atılan iddia isə lap ağlasığmaz oldu...
“Real”ın ulduz futbolçusu İsveçdə bir qıza təcavüz etməkdə günahlandırılır. Yerli polis artıq hadisə ilə ilə bağlı araşdırmaya başlayıb. Məlumata görə, hadisə oktyabrın 10-da Stokholmun mərkəzindəki oteldə baş verib. İlkin istintaqı böyük prokuror Marina Çirakova aparır. O isə iddianın yayıldığı ilk günlərdə mətbuata açıqlama verməyi lazım bilməyib. Futbolçunun ətrafı ittihamın tamə yalan olduğunu bəyan edib. Mbappe isə PSJ-nin bu işdə əli olduğuna işarə vurub. Onun yayda müqaviləsini yeniləməməsi və sabiq klubunu havayı tərk etməsi Parisdə çox pis qarşılanmışdı.
Mbappe İsveç qanunlarına görə 6 ilə qədər həbs cəzası ala bilər.

Bu cəza ittihamçı fransalı forvardın zorlamada günahkar olduğunu sübut edəcəyi halda baş verəcək. Kilianın adı faktiki cinayət işində şübhəli şəxs kimi hallanır. Fransanın “RMC Sport” nəşrinin məlumatına görə, o, cinsi əlaqənin qarşılıqlı razılıq əsasında baş verdiyinə əmindi. Bu mənbəyə inansaq, futbolçu Stokholmdakı oteldə gecəni birlikdə keçirdiyi qızın mesajlarını saxlayıb. “RMC Sport”un məlumatında 25 yaşlı fransalının Stokholma 5 gün çəkən qalmaqallı səfərə 100 min avro xərclədiyi də bildirilib.

“Real” bu məsələ ilə bağlı təcili iclas keçirib. Madrid klubunun rəhbərliyi fransalı futbolçu ətrafında yaranmış vəziyyəti müzakirə edib. Xatırladaq ki, “Real”a azad agent kimi keçən dünya çempionu komanda ilə bütün turnirlərdə 11 matçda iştirak edib, 7 qol vurub və 1 məhsuldar ötürmə verib. Kilianın müqaviləsinin müddəti 2029-cu ilin yayına qədərdi.