"Turan Tovuz" Misli premyer-liqasının evdə keçirilən 16-cı tur matçında "Şamaxı"nı məğlub etdi - 3:2.

"Football-plus.az" xəbər verir ki, "bozqurd"un baş məşqçisi Kurban Berdıyev oyunsonrası mətbuat konfransında jurnalistlərin suallarını cavabladı.

- İki fərqli hissə izlədik. Birinci hissədə həvəssiz çıxış etdik. İkinci yarıda isə daha yaxşı oyun göstərdik. Futbolçularımın uğuruna görə sevinirəm.

- Bu gün qələbə qazandız. Amma əvvəlki oyunlarda xeyli nöqsanlara yol verildi. Xallar itirildi. Tovuz azarkeşi olsaydız, bu oyunlardan zövq alardız?
- Müəyyən hissələrdə yaxşı təsir bağışladıq. Ümumi götürsək, komandanın çıxışından razı qalmaq mümkündü.

- Araş Qadirinin performansı haqda nə deyə bilərsiz?
- Araş yavaş-yavaş öz formasını bərpa edir. Onun belə təzyiq altında olmasının tərəfdarı deyiləm. Onu deyim ki, işinin öhdəsindən gəldi.

- Əvvəllər Tural Bayramlının çıxışı haqda xoş sözlər demisiz. Amma nə kubok matçında, nə də bu oyunda onu meydanda görmədik. Bu, nəylə bağlıdı?
- Məsələ həm də Turalın özündən asılıdı. Situasiyalara əsasən qərar veririk. Onun məşqlərini görürəm. Bu, elə bir haldı ki, şans Turalı tapmalıdı.

- Bəs, belə mövzular futbolçuya psixoloji cəhətdən mənfi təsir edə bilərmi?
- Komandamız mübarizəyə davamlıdı. Hamı məşq etməyə, oynamağa çalışır. Təəssüf ki, Azərbaycanda hansısa futbolçuya bir oyun şans verməyəndə həvəsdən düşür. Belə hallar məşqçi üçün çətindi.

- Marandiçidən sonra Xəyalı da itirdiz. Qarşıda "Araz-Naxçıvan" və "Neftçi"ylə oyunlar var. Komandanı növbəti matçlara hazırlaşdırmaq çətin olmayacaq?
- Xəyalın zədəsinin ciddi olmadığını düşünürəm. Ümid edirəm ki, növbəti matçda meydana çıxa biləcək.

- Qələbəni Denis Marandiçiyə həsr etmək olarmı?
- Əlbəttə! Biz Denislə daim əlaqədəyik. İnanırıq ki, ən qısa zamanda yanımıza qayıdacaq. Hər futbolçumuz bizim üçün önəmlidi.

- Ayxan Abbasov dedi ki, "Turan Tovuz"un qələbəsində azarkeşlərin də rolu var. Siz də belə düşünürsüzmü?
- Təbii ki, elədi. Bizim azarkeşlərimiz ən yaxşısıdı. Onlar həm səfərdə, həm də evdə yanımızda olurlar.

- Qış hazırlıq planı bəllidimi? Sizcə, vaxt az deyilmi?
- Türkiyəyə yollanacağıq. Yanvarın 4-dən 13-ə kimi orda olacağıq. Vaxtı isə federasiya təyin edir. Bu haqda nəsə deyə bilmərəm.

KƏNAN BAHADIR