"Elfsborq”la oyunda da meydandan qalib ayrılmaq istəyirik" - Qurban Qurbanov
Ölkə kubokunun 1/8 final mərhələsinin “Qəbələ” - “Qarabağ” oyunundan (0:2) sonra "Qarabağ"ın baş məşqçisi Qurban Qurbanovun brifinqi keçirilib.
"Football-plus.az" xəbər verir ki, təcrübəli mütəxəssis görüş barədə fikirlərini açıqlayıb:
“Qalib gəlmək vacib idi. Bunu reallaşdırdığımız üçün sevinirik. Bu, heç də asan olmadı. Qarşımızda çox yaxşı müdafiə olunan və təhlükəli əks-hücumlara keçən kollektiv var idi. Növbəti mərhələyə vəsiqə qazandığımız üçün futbolçularımızı təbrik edirəm. Belə bir havada uzaq məsafə qət edib bizi dəstəkləməyə gələn azarkeşlərimizə təşəkkür edirəm”.
Baş məşqçi Misli premyer-liqasının 16-cı turu çərçivəsində dekabrın 7-də "Sabah"la keçiriləcək oyun barədə də danışıb:
“Biz daha çox öz oyunumuz, futbolçuları qarşıdakı matça yaxşı hazırlaşdırmaq barədə düşünürük. “Sabah” həmişə istəkli komanda olub. Onlarla oyunlarımız maraqlı keçib”.
Qurban Qurbanov Avropa Liqasının əsas mərhələsinin 6-cı turunda İsveçin “Elfsborq” klubu ilə dekabrın 12-də keçiriləcək səfər matçına da qələbə üçün yollanacaqlarını söyləyib:
“Elfsborq”la oyun bizim üçün vacib olacaq. İstənilən turnirdə lazımi nəticəni əldə etməyə çalışırıq. Bunun üçün hər görüşdə qalib gəlmək çox önəmlidi. “Elfsborq”la oyunda da meydandan qalib ayrılmaq istəyirik. Hər qələbə bizə əlavə avrokubok təcrübəsi qazandırır. Həmin qarşılaşmaya ciddi hazırlaşacağıq”.
Digər xəbərlər
