Artıq qrup qalibi olan İspaniya ilə liqanı tərk etməsi rəsmiləşən İsveçrənin dueli yalnız futbol qurmanları üçün maraqlı idi. Ona görə ki, Luis de la Fuentenin komandasının oyunu Yamalın və bəzi başqa ulduzların yoxluğunda da yetərincə cəlbedicidi.

Maraqlıdı ki, bütün ölkəni dolaşmaqda olan “qırmızı furiya” Murat Yakının komandasını Kanar adalarında qəbul etdi və burda məhz bu regionun yetirməsinin hesabı açmaq şansı real idi. Ancaq “Barselona”nın yarımmüdafiəçisi Pedri Moratanın qazandığı penaltini qola çevirə bilmədi. Hücum davam etdi və elə həmin adanın digər yetirməsi Pino fərqləndi.

Meydanda əsas hadisələr fasilədən sonra cərəyan etdi. Hər iki komandada əvəzetmələr işə yaradı. Əvvəlcə gözəl reyd edən Monteyro iti bucaq altından dəqiq zərbə vurmaqla isveçrəliləri sevindirdi. İspaniya cəmi 5 dəqiqə sonra Xilin sayəsində növbəti dəfə irəli çıxsa da, yenidən üstünlüyü əldən verdi. Kapitan sarğısını daşıyan Ruis topu cərimə meydançasından çıxarmağa hazırlaşarkən rəqib oyunçunun ayağına toxundu.

Oyundakı ikinci penalti – bu dəfə qonaqların ifasında – dəqiq oldu. Sən demə, bu da son deyilmiş. Almaniyalı referi Dankert 3-cü uzatma dəqiqəsində 3-cü dəfə penalti nöqtəsini göstərdi. Xilin ardından meydana sonradan çıxan daha bir futbolçu – Saraqosa da özünü göstərdi. O, özü qazandığı penaltini dəqiq yerinə yetirdi. İspaniya heç bir əhəmiyyət daşımayan oyunlarda da azarkeşlərini darıxmağa qoymur! Bu komanda il ərzində keçirdiyi 13 rəsmi oyunun heç birində uduzmayıb. Bu nəticə kimi, 12 qələbə də milli rekorddu.

Bu qrupdakı Serbiya – Danimarka oyunu daha böyük maraq doğururdu. İlk yarını cəsarətlə qapıçıların ayağına yazmaq olar. Əvvəlcə Şmeyhel komandasını xilas etdi. Ardından Petroviç möcüzələr törətməyə başladı. Xüsusən də onun Poulsenin uzaq küncə zərbəsini dəf etmək üçün necə uçduğunu görməyə dəyərdi. Və əlbəttə, “ağ qartallar”ın bombardiri Mitroviç özünü qeyri-adi şəkildə göstərdi. O, qol vurmasa da, bir epizodda “qayçı” zərbəsi ilə topu qapı xəttindən çıxardı. Danimarka 1/4 finala vəsiqə qazandısa, Serbiya A liqasında yerini qorumaq üçün pley-off oyunları keçirəcək.

A liqası, 4-cü qrup
İspaniya – İsveçrə 3:2 (1:0)
İspaniya: Remiro (Sançes, 46), Qrimaldo, Paredes, Kubarsi, Minqesa, Ruis, Kasado, N.Uilyams (Xil, 60), Pedri (Barrios, 79), Pino (Saraqosa, 69), Morata (Omorodion, 46).
İsveçrə: Mvoqo, R.Rodriges, Muhaym, Comərt, Fernandes, Caka (Rider, 60), Froyler, Kutesa (Okafor, 72), Zom (Syerro, 60), Uqriniç (Zekiri, 46), Amduni (Monteyro, 46).
Qollar: Pino, 32 (1:0). Monteyro, 63 (1:1). Xil, 68 (2:1). Zeçiri, 85-p. (2:2). Saraqosa, 90+3-p. (3:2).
Pedri 32-ci dəqiqədə penaltidən yararlana bilməyib (qapıçı).
Vərəqələr: Pino, 62. Comərt, 81. Saraqosa, 84 – sarı.
Hakim: Bastian Dankert (Almaniya).
18 noyabr. Santa-Krus-de-Tenerife. 21204 tamaşaçı.

Serbiya – Danimarka 0:0
Serbiya: Petroviç, Pavloviç, Milenkoviç, Velkoviç, N.Maksimoviç, Qudel (Zdelar, 72), Terziç, Samarciç (A.Maksimoviç, 72), Jivkoviç (İvanoviç, 82), Mitroviç, Vlahoviç (Nedelkoviç, 88).
Danimarka: Şmeyhel, Kristiansen, Vesterqor, Nelsson, Roerslev Rasmussen, İsaksen (Skov Olsen, 87), Eriksen, Yulmann, Damsqor (Heylunn, 70), Poulsen (Nerqor, 53), Dolberq (Qrenbek, 70).
Vərəqələr: Dolberq, 25. Terziç, 26. Milenkoviç, 41. Jivkoviç, 80. Pavloviç, 90 – sarı. Pavloviç, 90+5 – qırmızı (ikinci sarı).
Hakim: Feliks Svayer (Almaniya).
18 noyabr. Leskovats. 7295 tamaşaçı.

1. İspaniya 6 5 1 0 13-4 16
2. Danimarka 6 2 2 2 7-5 8
3. Serbiya 6 1 3 2 3-6 6
4. İsveçrə 6 0 2 4 6-14 2

Faktlar
* İspaniya yığması öz rekordunu yeniləyib. “Qırmızı furiya” 2024-cü ildə yoldaşlıq matçları da daxil olmaqla keçirdiyi 17 oyunun 14-də qalib gəlib. Daha əvvəl yığmanın ən yaxşı göstəricisi 2010-cu ildə dünya çempionu olduğu vaxta təsadüf edib. İspaniya həmin dönəmdə 17 qarşılaşmanın 13-də meydandan qələbə ilə ayrılıb. Qeyd edək ki, ispanlar sonuncu dəfə bu il martın 23-də Kolumbiyaya yoldaşlıq oyununda yenilib - 0:1.
* Pedri karyerasındakı ilk penaltini qola çevirə bilmədi. 21 yaşlı yarımmüdafiəçi oyunsonrası penalti seriyalarını nəzərə almasaq, klubu və yığmanı əhatə edən peşəkar karyerası ərzində ilk dəfə “nöqtə”yə yaxınlaşmışdı.

Oyundan sonra
Luis de la Fuente, İspaniya yığmasının baş məşqçisi: