Avropa çempionları daha bir səddi aşdı - ŞƏRH
Luis de la Fuente təkcə yüksək səviyyəli mütəxəssis deyil, həm də yaxşı adamdı.
O, komandaya motivasiya verməyi, kollektivdə ailə ab-havası yaratmağı bacarır. Bu planda onun üçün xırdalıqlar yoxdu. Məsələn, yığma Olimpiadaya yollanarkən sabiq köməkçisi Santi Deniyanın çalışdırdığı komandanın düşərgəsinə yollanıb xeyir-dua verir. Yığmanın oktyabr oyunları ərəfəsində isə ağır zədə ilə üzləşən Rodri və Karvaxal düşərgəyə gəldi. Hər ikisi əsa ilə gəlmişdi, oyundaşları onlar üçün çempionluq dəhlizi düzəltdi. Bax, belə komandanın yaşıl meydanda uğur qazanması da təbiidi.
Bu dəfə “qırmızı furiya”nın heyətində nə “Real”ın, nə də “Atletik”in təmsilçisi var idi. Amma onlarsız da İspaniya yığması yetərincə güclüdü. Yeri gəlmişkən, yığmanın kapitanı Morata Mursiyadakı “Nueva-Kondomina” stadionunda keçirilən oyun ərəfəsində Avropa çempionatında qazanılan kuboku publikaya göstərdi. Amma Alvaro meydanda çox yaxşı imkanı qaçırdı. Milli komandada artıq 17-ci oyununu keçirən Yamal da hədəfə düşə bilmədi. Danimarka yığmasını da hesabdan silməyək. Qonaqlar zaman-zaman təhlükəli vəziyyətlər yaradırdı. Məsələn, epizodların birində Rayya son anda topu Dolberqin ayağından götürə bildi.
Ümumiyyətlə, zədəlilərin çoxluğu İspaniya yığmasının oyununa əməlli-başlı təsir göstərdi. Start heyətində sonuncu Avropa çempionatının finalında meydana çıxanlardan yalnız dördü var idi. Belə yarımcan heyətlə də meydan sahibləri fasilədən sonra təzyiqi artırdı. Ruis Moratanı zərbə mövqeyinə çıxarsa da, o, irəli çıxıb məsafəni azaldan Şmeyhelin öhdəsindən gələ bilmədi. Daha bir epizodda Lyaportun cərimə meydançası xaricindən zərbəsindən sonra top əlverişli mövqedə olan Moratanın ayağına düşdü. Onun zərbəsi zamanı Şmeyhel ustalığını göstərdi. İspaniya yığmasının qol axtarışı, nəhayət, 79-cu dəqiqədə nəticə verdi. “Real Sosyedad”ın yarımmüdafiəçisi Subimendi yığmanın yeni qəhrəmanı oldu.
Düzdü, zərbə zamanı səkən topun Şmeyheli çaşdırdığını da vurğulamalıyıq. Bu turnirdə indiyə qədər qol buraxmayan danimarkalı qapıçı yaxın küncə zərbənin öhdəsindən gələ bilmədi. Bu qol “qırmızı furiya”nı turnir cədvəlində zirvəyə çıxardı.
Bu qrupun digər oyununda Serbiya ilk iki qarşılaşmada uduzan İsveçrəni qəbul etdi. Serblərin baş məşqçisi Draqan Stoykoviç müdafiə xəttini yenidən qurmuşdu. Mərkəz müdafiəçilərinin “üçlüy”ünə Erakoviçi daxil etmiş, 18 yaşlı Nedelkoviçi isə cinaha qoymuşdu. Serb müdafiəçilər birbaşa funksiyalarının öhdəsindən gəlməklə yanaşı, rəqib qapısı önündə də fəallıq göstərirdilər. Hesab ilk yarının sonunda açıldı. Samarciçin yerinə yetirdiyi cərimə zərbəsindən sonra Milenkoviç topu tora göndərdi. Elvedi avtoqola səbəblkar oldu.
İkinci hissənin əvvəlində Yoviç fərqi artırmaq imkanını əldən verdi. Ümumiyyətlə, hər iki komandanın hesabı dəyişmək imkanları oldu. Stoykoviç zədələnən Lukiçi Zdelarla əvəzlədi. Qonaqların vurduğu qol ofsayd üzündən sayılmayandan sona Mitroviç kiçik şedevr yaratdı. Artıq meydanı tərk etmək üzrə olan snayper ardından Akancini arxada qoyaraq cərimə meydançasına daxil oldu və yuxarı küncə dəqiq zərbə vurdu.
Bu oyunun daha bir qəhrəmanı qonaqların qol cəhdlərinin qarşısına fədakarlıqla alan, hətta Embolonun penaltisini də qaytaran Raykoviç oldu.
A liqası, 4-cü qrup
3-cü tur
İspaniya – Danimarka 1:0 (0:0)
İspaniya: Rayya, Porro, Vivian, Lyaport, Qrimaldo, Subimendi, Ruis, Yamal (S.Qomes, 90+3), Pedri, (Merino, 62), Oyarsabal (Baena, 62), Morata (Xoselu, 78).
Danimarka: Şmeyhel, Kristensen, Vesterqor, Nelsson, Bax, Heybyerq, Yulmann, Kristiansen, Qrenbek (Heylunn, 78), Eriksen (İsaksen, 73), Dolberq (Poulsen, 73).
Qol: Subimendi, 79.
Vərəqələr: Yulmann, 23. Kristensen, 85. Bax, 88. Nelsson, 90+3. Rayya, 90+4 – sarı.
Hakim: İvan Krujlyak (Slovakiya).
12 oktyabr. Mursiya. 29870 tamaşaçı.
Serbiya – İsveçrə 2:0 (1:0)
Serbiya: Raykoviç, Pavloviç, Milenkoviç, Erakoviç, Birmançeviç (Çumiç, 88), Qruiç (Yoviç, 46), N.Maksimoviç, Nedelkoviç (Simiç, 73), Lukiç (Zdelar, 53), Samarciç, Mitroviç (A.Maksimoviç, 73).
İsveçrə: Kobel, Rodriges (Qarsiya, 70), Akanci, Vidmer (Rider, 46), Ebişer (Fernandeş, 70), Caka, Froyler, Elvedi, Ndoy, Embolo (Montero, 85), Amduni (Zekiri, 70).
Qollar: Elvedi, 45+1-öz qapısına (1:0). Mitroviç, 61 (2:0).
Embolo 72-ci dəqiqədə penaltidən yararlana bilməyib (qapıçı).
Vərəqələr: Vidmer, 23. Elvedi, 44. Nedelkoviç, 71. Simiç, 84. Samarciç, 90+3 – sarı.
Hakim: Simone Sotsa (İtaliya).
12 oktyabr. Leskovats. 6383 tamaşaçı.
1. İspaniya 3 2 1 0 5-1 7
2. Danimarka 3 2 0 1 4-1 6
3. Serbiya 3 1 1 1 2-2 4
4. İsveçrə 3 0 0 3 1-8 0
15 oktyabr: İspaniya - Serbiya, İsveçrə - Danimarka.
Oyundan sonra
Luis de la Fuente, İspaniya yığmasının baş məşqçisi:
“Yamalın ayağına daim zərbə vururlar... Mənim bir komanda yoldaşım var idi, gileylənənlərə həmişə belə cavab verərdi: “Bəs siz nə gözləyirdiz, öpüş?” Rəqib bütün yol verilən metodlardan yararlanmağa çalışır. Qaydalar çərçivəsində maksimal dərəcədə sərt oynamaq lazımdı. Hakim isə məhz bunun üçün, yəni sərtliklə kobudluğun sərhədlərini müəyyənləşdirmək üçündü. Böyük istedada malik gənc oyunçuları tez-tez məhz bu yolla qorxutmağa, onlarla təmasda olmağa çalışırlar. Hakim Yamal kimi oyunçuları qorumağa borcludu. Ancaq Lamin də belə vəziyyətə uyğunlaşmağı bacarmalıdı. Bəlkə də bəzi oyun epizodlarında topla daha tez vidalaşmalıdı. Mən də istərdim ki, meydan Yamal üçün qızılgül baxçası olsun, ancaq futbolun təbiəti belədi, futbol sərt idman növüdü”.
Viktor Nelsson, Danimarka yığmasının müdafiəçisi:
“İspanlarla səfər oyununda rəqibə qol vəziyyətləri yaratmaqda mane olmaq mümkünsüzdü. Çox çətin oyun idi. Bu oyunda dözməli olduğumuz anların olacağını bilirdik. Bununla belə, məyusam. Hesab edirəm ki, heç-heçə haqqımız idi”.
Digər xəbərlər
