Ölkəmizin futbol yığması bu gün Millətlər Liqasının C liqasında növbəti oyununu keçirəcək.

Millətlər Liqası
qrup mərhələsi, 5-ci tur
Azərbaycan – Estoniya 0:0
Hakimlər: CON BİTON, Daniel Makfarlan, Devid Makqeçi, Metyu Makdermid.
16 noyabr. Qəbələ, şəhər stadionu. Saat 18.00.

Məlum olduğu kimi, millimiz Estoniyayla 3-cü tur matçında da qarşılaşdı. Hələ həmin oyundan əvvəl dərc etdiyimiz afişada bildirmişdik ki, estonlar qrupda arxayınlıqla məğlub edə biləcəyimiz yeganə rəqibdi. Yığmamız oktyabrın 11-də bu komandanın meydanından məğlub ayrılmaqla (1:3) hər kəsi yanıldı. Bu üzdən indi həmin arxayınlığın yerini ciddi narahatlıq alıb.

Təbii ki, millimizə güvənməli, “doğma divarlar” arasında layiqli oyun göstərərək Millətlər Liqasının yeni mövsümündəki ilk qələbəsini qazanacağına ümid etməliyik. Düzü, başqa yol da yoxdu. Amma narahatlığımız səbəbsiz deyil. Bəli, oyun ölkəmizin gözəl təbiətlə yanaşı, demək olar ki, qüsursuz infrastruktura malik bölgəsində, yəni Qəbələdə keçirilir. Özü də ilk dəfə! Deməli, bu məqam bizi sevindirməli və qələbəyə olan ümidlərimizi artırmalıdı. Lakin arenada olan uyğunsuzluqlar üzündən satışa cəmi 1800 biletin çıxarılması azarkeş dəstəyiylə bağlı üstünlüyü xeyli azaldır ki, bu da gözləntilərə təsirsiz ötüşmür.

Növbəti məqam isə Emin Mahmudovun və Rüstəm Əhmədzadənin zədəli, Slovakiyayla qarşılaşmada qırmızı vərəqə alan Mahir Emrelinin cəzalı olmasıdı. Belədə hücum epizodlarında “dişsiz” görünə bilərik. Deməli, Ozancan Kökçü, Ramil Şeydayev, Musa Qurbanlı və Nəriman Axundzadəylə yanaşı, yarımmüdafiəçilər də, hətta arxa xətt oyunçuları belə qol vurmaq üçün alışıb-yanmalıdı. Ona görə ki, millimizə heç-heçə də sərf etmir. Amal yalnız qələbə olmalıdı! Bunun üçün lazımi anda hücum etmək və müdafiə olunmaq kimi taktiki-texniki balans qorunmalıdı ki, Fernando Santuşun ən düzgün seçimi etməkdən başqa çarəsi yoxdu. O, Emini İsmayıl Zülfüqarlı, Rüstəmi isə Musa Qurbanlıyla əvəzlədi. Yəqin ki, kapitan sarğısını kimin daşıyacağıyla bağlı qərarı da xeyli götür-qoy edəcək.

Hər halda, yığma noyabrın 12-dən bəri Qəbələdədi və oyuna yaxşı hazırlaşıb. Bəs estonların durumu necədi? Düzdü, komanda millimizi məğlub edəndən sonra özünəinam qazanıb. Lakin bir qələbəylə D liqasına yuvarlanmaqdan xilas ola bilməyəcəklərinin fərqindədilər. Məhz bu üzdən ölkəmizə növbəti dəfə 3 xal qazanmaq və ya ən azı heç-heçə üçün gəliblər.

Xatırladaq ki, turun digər matçında İsveç Slovakiyanı qəbul edəcək. Həmin matçın start fiti saat 23.45-də səslənəcək.

1. İsveç 4 3 1 0 11-3 10
2. Slovakiya 4 3 1 0 8-3 10
3. Estoniya 5 1 1 3 3-8 4
4. Azərbaycan 5 0 1 4 3-11 1

KƏNAN BAHADIR